Mawkyrwat, K’Lyngkot 23 : Ka Mawlangwir Sports Club ka ïoh ban rah ïa ka nam nongjop ha ka phainal jong ka 2nd Inter-Village Football Tournament 2025-26 ba la seng da ka Veteran Football Committee jong ka Mawten Sports Club da kaba pynliem noh ïa ka Mawten Sports Club tang da shi kol la nod ha Mawpyllun Mini Stadium, Mawten, Mawkyrwat, South West Khasi Hills District.
Kane ka jingïalehkai ka la long kaba itynnad bha ha kaba baroh ar tylli ki kynhun ki la ïakhun ban thep kol hynrei khlem da lah ban ïoh ban thep haduh ban da kut ka por ïalehkai. Kumta u referee ne u nongpynïaid hapdeng madan u la hap ban pynïaleh noh da ka extra time. Ha kane ruh, ym shym la don ba lah ban thep kol ha ka kylla ba nyngkong.
Hynrei ynda la poi ha ka kylla kaba ar bad ha ka minit kaba khatduh eh, ka Mawlangwir SC ka la ïoh ka lad ban thep ïa ka kol lyngba u Arrowstar Wanniang. Lyngba tang kane kawei ka kol hi ka Mawlangwir SC ka la rah ïa ka nam nongjop jong kane ka lympung ïalehkai bad rah ïa ka khusnam bad ka song tyngka kaba ? 45,000. Katba ka Mawten SC kaba ka wan ba ar ka la ïoh ban rah ïa ka song tyngka kaba ? 25000.
Ka Mawten SC ka la ïoh ban ai ruh ïa ki khusnam shimet sha ki rangïalehkai ba kynsai jong kane ka lympung ïalehkai kum u top scorer, best player bad best goalkeeper kum ka jingaimynsiem ïa ki.
Ha kane ka phainal la sakhi ruh ïa ka jingwankyrshan jong ki nongkyrshan na baroh ar liang ki kynhun.
Kum ban shu pynkynmaw, ka Mawlangwir SC ka la long ka lahduh ha ka 1st Inter-Village Football Tournament jong ka snem 2025 ba la pynlong da ka Mawten SC.
Da kaba rah biang ha ka snem 2026, ka Mawlangwir SC ka la rah ar sien ïa kane ka nam ha kane ka lympung ïalehkai.
