Khliehriat, K’Lyngkot 21 : Ka ophis jong u Deputy Commissioner, East Jaiñtia Hills District mynta ka sngi ka la pynlong ïa ka prokram jingrakhe ïa ka sngi ba kyrpang ka jingioh jylla ka Meghalaya kaba la kynjoh sha ka 54 snem, ka 54th Meghalaya Day bad ïa ka prokram la pynlong ha Conference Hall ha ophis u Deputy Commissioner ha Khliehriat, East Jaiñtia Hills District.
Haba kren ha ka jingialang u Additional Deputy Commissioner, East Jaiñtia Hills District, u bah C.P. Mawkon, MCS u la ong ba ka Meghalaya Day kam dei tang ka jingrakhe kynmaw burom hynrei ka pynkynkynmaw ruh ïa ka khana kaba shisha ka ban sah pateng la pateng ba kumno kiba ïakhun ban ioh jylla ki la len ïalade haduh ban ioh ïa ka jylla kaba pura, u wanrah biang ïa ka sngi jong ka 21 tarik u kyllalyngkot 1972, ba ka Meghalaya ka ioh ïa ka jylla kaba pura dei hapor ba ka Indira Gandhi ka dang long ka nongialam jong ka ri India kaba bat kum kamyntri rangbah duh ka ri.
U bah Mawkon, MCS u la kren ruh katto katne halor ki jingnoh syniang jong ki nongialam kiba leit noh ha kaba da ka jingskhem jingmut bad ka mynsiem ba shitrhem ki la tei ïa ka nongrim ha kaba haduh mynta myne ngi dang ioh ban lehkmen ïa kane ka sngi, u la ong ruh ba ka jylla ka la lah ruh ban kynjoh sha ka thong naduh ki por kiba la leit naduh ka jingdon ki surok, ki lynti ki syngkien, ka pule ka puthi, ki jingtei, ka imlang ka sahlang, ka iohkam ioh jam bad ka jingkiew ka longbriew man briew, ka jingkiew ki kam kiba na ka liang ka sorkar bad bad na ka liang ki kam jong ki briew shi met bad kane ka jing kiew ka dei kaba mih na ka jingiaid lynti kaba jlan jong ka sorkar bad ki nongshong shnong jong ka jylla.
U ADC u la kren shuh shuh ruh halor ka jingdon ka jingkitkhlieh ban ïatreilang ban pyntikna ïa ka jingkiew irat bad ki jingioh myntoi ki nongshong shnong ha ka roi ka par khamtam ki nongshong shnong kiba na ki shnong kiba kyndong, kumjuh ruh ka jingiatreilang, ka jingiatylli jong ki tnat trekam bapher bapher ban dup pynkhlaiñ ïa ka ioh ka kot bad ban kyntiew ïa ka lawei.
Kumjuh ruh u Additional Deputy Commissioner, East Jaiñtia Hills District, u S.R. Marak, MCS u kyntu ïa baroh ban buh ïa ka jylla hakhmat lane “State First” da kaba buh shwa sharud ïa ki jingioh jingmyntoi ba tang shi met bad ki jingsngewpher jingmut khnang ban wanrah shuh shuh ïa ka bha ka miat, u la ong ba ka jingiohi jngai ka jylla ka dei beit na ka bynta ka bha ka miat jong ki paidbah jong ka jylla.
U ADC, Marak u la kren ruh halor ka jingstad bad jingshemphang jong ki nongialam kiba ha kito ki por ba dang iakhun ban ioh jylla kiba don kata ka jingryntih, ka jingiatylli bad kaba la lam ruh sha ka thong haduh ban ioh ïa ka jylla ba pura, u kyntu ïa baroh ki heh sorkar kiba trei ïa ki kam ha ki jinglah bapher bapher ban shim ïa ka jingai mynsiem na kito ki por kiba la leit ban long kiba ryntih,ban long kiba iohi jngai bad trei bha ïa ki kam ban pyn tikna ba ka jingai jingshakri ka sorkar kan long kaba don jingmut bad kaba wanrah jingmyntoi ïa ki paidbah.
Ha kane ka prokram la ioh ruh ki jingrwai na ki khynnah skul jong ka Khliehriat Higher Secondary School bad ki jingshad tynrai na kikhynnah skul jong ka Khliehriat Presbyterian Higher Secondary School, kiba la pyni shynna ïa ka jingriewspah ka jylla ha ka jongdon ki lariti bad la pynkut ïa ka prokram da ka jingkren ai khublei na ka Assistant Commissioner, ka E.D Shira, MCS bad bud pat da kaba tem ïa ka jingrwai Meghalaya State Anthem.
