Phah tuklar u Bah Sanbor bad ka BJP ha u Rajnath Singh ban pynkynriah ïa ki Dalit Sikh

Shillong, K’Lyngkot 21: Ka kynhun jong ki nongialam ka BJP ba la ïalam da u Myntri sorkar u Bah Sanbor Shullai uba dei ruh u MLA ka BJP na South Shillong bad u State President ka BJP u Rikman G. Momin ki la ïa kynduh ïa u Rajnath Singh kila phah tuklar lem ban lah pynbeit noh kloi ia ka kam ba sahteng ha kaban pynkynriah ia ki Dalit Sikh na Them ïew Mawlong sha Contonment Area.
U Bah Sanbor Shullai, uba mih khmat ïa ka thaiñ Shillong Cantonment Board, u la pynsngew ha u Myntri ïada ri ka sorkar pdeng halor ka jingkynrum kynram jong kane ka kam bad u la kyntu ïa ka Ministry ban shim noh kham kloi ia ka rai kaba mynjur lang.
Ha kane ka jingïakynduh, Ka kynhun kala kyrpad ruh ïa u Myntri ka Sorkar Pdeng ban pynthikna ha ka jingpyntreikam kloi ïa ka Building Byeplaw bala mynjur dang shen da ka Contonment Board bad ban pynsted noh ïa ka jingpyn thymmai ïa ka polcy hapoh ka Contonment Area.
Nalor kane, ki nongialam kila kyrpad ïa ka jingmynjur ba kham kloi na ka bynta ka jingaiti ïa ka jaka kaba donkam na ka bynta ban lah pyndep noh kloi ïa ka Shillong flyover project.
“U Myntri kam ïada ri ula sngap bha ïa ka kynhun bad kular ba ïa kine ki kam baroh bala pynsngew, un sa shong bishar bad un sa ïakren ruh bad ki bor ba dei khmih” ong u Bah Sanbor.
Ula pynpaw ba ka kynhun kan sa ïakynduh ruh biang ïa u Myntri kam ïada ri ban buddien ïa kine ki kam bad ban pynthikna ïa ka jingpyntrei kam kloi ïa ki.