Shillong, K’lyngkot 21: Ka Khasi Students’ Union (KSU) Delhi Unit, ka la ïoh ban pynlait ïa kawei ka thei samla kaba na ka jylla Meghalaya na ka jingshah pynïaid kam awria bad shah thombor ha ka kynhun ki riew runar, kiba suba donkti ha ka kam pynïaid kam awria, na ka ïingsah jong ka na Delhi.
Katkum ka kyrwoh ka President ka KSU Delhi Unit ka Marbiang Khongwir ka la ong, “Ngi la ïoh pdiang ïa ka phone call ba pan jingïarap na ka hynmen jong kane ka samla, kaba pyntip ba ka para jong ka, ka la shah thombor bad shah ktah kti ha ka kynhun ki shynrang ha ka ïingsah jong ka. Ngi la pyntip mar mar ïa ka SPUNER bad ki Pulit ka Nagar Police Station, kiba la poi sha katei ka jaka bad ïoh pynlait ïa kane ka samla.”
Shuh shuh katkum ka jingong ka Samla Khongwir, ha ka jingtohkit, la pyntip ba kane ka samla ka la wan sha Delhi ban wad kam hynrei ka la shah pynbiej ha ki kam khaïi met. Kine ki nongshah kynnoh, kiba pynïaid ïa ka ktem awria, ki la shoh ïa ka haba ka kyntait ban trei ïa kane ka kam kaba pynpoh ïa la ka long rynïeng.
“Ki briew kiba shoh ïa ka ki dei kiba pynïaid ïa ka ktem awria. Tang namar ba ka kyntait ban leh ïa ka kam, kala shah shoh bad une u briew ula byrngem ruh ban pynïap ïa ka,” ong ka samla Khongwir.
Ïa kane ka samla bad u runar la rah noh da ki Pulit ban pynlong ïa ka jingtohkit. Ka KSU Delhi Unit ka la ïatreilang bad ki bor Pulit ban pynthikna ïa ka jingïoh wanphai suk kane ka samla sha la ka jong ka Jylla hadien ba pyndep ïa ki jingdonkam baroh katkum ka aiñ.
Ka samla Khongwir ka la kyntu ïa ka Sorkar ba kan shim ïa ki sienjam ba tyngeh pyrshah ïa ka kam khaïi briew bad kam ïuhroit ïa ka long rynïeng khnang ban khanglad ïa kum kine ki jingjia hadien habud.
Ka KSU Delhi Unit ka la kyntu ruh ïa ki paidbah khamtam kito kiba wad kam, ba kin da husiar bha bad peit pyrman, bad ban pyntip ïa kino kino ki kam ba ishankhmat sha ki bor Sorkar.
