Shillong, K’Lyngkot 21 : U Myntri Rangbahduh ka Ri, u Narendra Modi u la kynmaw kyrpang ïa ka Meghalaya da kaba ai khublei ïa ki nongshong shnong ka jylla ha ka lyngdap 54 snem ka jingïoh ïa ka jylla kaba pura ryngkat ka jingkular ba ka Sorkar Pdeng kan shimkhia ban kyntiew ïa ka Jylla bad ka thaiñ Shatei Lammihngi.
Ha ka jingpyllait khubor, u Myntri Rangbahduh u la ïaroh ïa ka jingitynnad ba kyrpang jong ka Meghalaya, ka jinglong tynrai ba riewspah, bad ki riti dustur ba kyrpang jong ki jaidbynriew Khasi, Garo bad Jaiñtia. U la pynpaw ïa ka jingburom jong ka Jylla ïa ka mariang, ka mynsiem jong ka jingïatylli, bad ka jingaiti ha ka jingpynkupbor ïa ki kynthei, da kaba kdew ba kine ki jinglong ki dang ïai bteng ban pynriewspah ïa ka kolshor jong ka ri India.
Haba pynkynmaw ïa ki jingwan jngoh jong u ïa ka Jylla, kynthup ïa ka jingwan jngoh jong u ïa ka Shillong ha u snem 2016 na ka bynta ka North Eastern Council Plenary Meeting, u Myntri Rangbahduh u la pynpaw ïa ka jingsngewkmen halor ka jingshimkhia bad ka jingpdiang sngewbha jong ki paidbah ka Jylla Meghalaya. U la pynpaw biang ba ka thain shatei lammihngi ka dei ka Ashtalakshmi jong ka India bad ban jur ba ka jingkiew jong ka India ka don ka jingïadei kaba tynrai bad ka roi ka par jong ka thaiñ.
U la ïaroh ruh ïa ka bynta jong ka Meghalaya khamtam eh ïa ka jingjop ban pynlong ïa ki jingïalang jong ki ri ka pyrthei kum ka jingïalang Think20 bad ka jingïalang halor ka kam haw haw, kaba la pyni ïa ka Jylla sha ka pyrthei bad kyntiew ïa ka kam jngohkai pyrthei hapoh ka ri.
Haba ïaroh ïa ka jingtreikam jong ka ïoh ka kot jong ka Jylla hadien ka COVID, u Myntri Rangbahduh u la kdew ïa ka jingkiew jong ka Meghalaya kaba long ka nuksa, ka jingpynïaid pisa kaba stad, bad ki jingpyrshang kiba bteng ha ki bynta kum ka jingpynbiang ïa ki ïing ki sem, ka rep ka riang, ka koit ka khiah, bad ka pule puthi. Shuh shuh u la kubur ïa ka jingktah kaba bha jong ki skhim bapher bapher jong ka Sorkar Pdeng ha kaba kyntiew ïa ki jingtei bad ki lad kamai jakpoh ha kylleng ka Jylla.
Da kaba pynpaw ïa ka jinglong jingman kaba khlaiñ jong ka Meghalaya ha ka liang ka jingïalehkai bad ka kolshor, u Myntri Rangbahduh u la pynskhem biang ïa ka jingkyrshan jong ka Sorkar Pdeng ïa ki jingtei kiba ïadei bad ka kam ïalehkai bad ka jingkyntiew ïa ki sap, khamtam haba ka Jylla ka dang pynkhreh ban pynlong ïa ka National Games ban wan. U la ïaroh ruh ïa ka bynta jong ka Meghalaya ha ka pyrthei ha ka rwai ka siaw bad ka kam saindur bad u la pynthikna ban bteng ban kyrshan ban kyntiew ïa kum kine ki sap.
U Myntri Rangbahduh u la kynmaw ruh ïa u PA angma (Bam kwah ha dwar u Blei) ha ka jingdap 10 snem jong ka jingkhlad noh jong u, da kaba pynpaw ba ka jingsngewthuh jong u shaphang ka thaiñ shatei lammihngi, bad khamtam eh ïa ka Meghalaya, ka long kaba khraw bad ba ka jingïohi jngai jong u ka dang ïai bteng ban ai mynsiem ïa ka roi ka par jong ka Jylla.
Haba jubab ïa ka khubor jong u Myntri Rangbahduh ka Jylla, u Myntri Rangbah ka Jylla Conrad K angma u la pynpaw ïa ka jingsngewnguh, da kaba ong, “Na ka bynta ki paidbah ka Meghalaya, nga ai khublei ïa u Myntri Rangbahduh ba donburom na ka bynta ki jingkyrkhu ba sngewtynnat jong u, ka jingïalam ba bteng, bad ka jingkyrshan ba skhem jong ka Sorkar Jylla bad ka Sorkar Pdeng ha ka roi ka par.”
U la pynpaw ruh ïa ka jingsngewnguh halor ka jingkynmaw bad jingai burom jong u Myntri Rangbahduh ïa u PA Sangma uba la khlad noh, uba ki jingthmu jong u ki dang ïai bteng ban ïalam lynti ïa ka roi ka par jong ka Meghalaya.
Ha kajuh ka por u Myntri ka tnad Kampohiing ka Ri, u Amit Shah ruh u la phah lang ïa kane ka jingaikhublei sha ki paidbah ka Jylla ha ka jingrakhe ïa ka jingdap 54 snem ka jingïoh jylla ba pura.
