Haduh 4,000 klur tam pynbna u CM ban shna surok bad ka umbam umdih ha South Garo Hills

Shillong, K’Lyngkot 21 : U Myntri Rangbah ka jylla, Conrad K Sangma ha ka sngi Balang u la pynbna haduh 4,140 klur tyngka na ka bynta ban kyntiew ïa ka roi ka pa ha South Garo Hills District la ka long naduh ki lynti syngkien haduh ka umbam umdih bad kiwei kiwei.
Haba kren ha ka jingïalang kaba long ha kane ka sngi, u Myntri Rangbah u la pyntip ruh ba ka sorkar jylla ka pyntikna ba baroh ki kam pynroi ki dei ban tuid lang mar kumjuh sha baroh ki bynta jong ka jylla da kaba bynrap ba ka South Garo Hills ka kham ïoh ïa ka jingpeit kyrpang ha kine ki hynñiew snem ba la dep.
Na kane ka 4,140 klur tyngka, u Myntri Rangbah u la pyntip ba haduh 4,000 klur tyngka la mang ban shna ïa ka surok Darugre sha Baghmara lyngba ka Siju ter ter shaduh Dalu. U la pyntip ba kane ka kam ka la ïaid shakhmat bad ka sah mynta sa tang ban ïoh ïa ka jingmynjur kaba khatduh. U la pyntip ruh ba ka jingshim jaka na bynta kane ka projek ka la ïaid shakhmat bad ka jingtyrwa ka don sa tang ban ïoh noh ïa ka jingmynjur na ka Ministry of Finance.
La pyntip ruh ba la mang haduh 140 klur tyngka na ka bynta ka Phase -II jong ka Baghmara Water Supply Project. Haba ïadei pat bad kane u la ong ba watla ka kham slem ban ïoh ïa ka jingmynjur hynrei ka projek khatduh ka la ïoh ïa ka jingbit da kaba ka song pisa yn ai da ka Ministry of Development of North Eastern Region (DoNER).
“La palat 23 snem ka South Garo Hills ka treikam khlem ka ophis ba pura jong u Deputy Commissioner bad ka shu bteng treikam na ka ophis treikam u SDO kaba pyni ïa ki bun tylli ki snem ka jingshah iehnoh bein. Hapoh kane ka sorkar MDA, la shimkhia mardor ïa kane ka ishu da kaba pyntrei mardor ïa kane ka ophis treikam. Watla ka quarter treikam jong ki nongtrei ka dang dei ka jingeh hynrei ka sorkar ka la treikam borbah ban pynurlong ïa kane ka jingdonkam,” ong u Myntri Rangbah.
U Myntri Rangbah u la pynpaw ruh ka jingdiaw halor ka jinglong jngman jong ka Captain Williamson Sangma College ha ka distrik kaba la ïoh ïa ka jingshimkhia jong ka sorkar ban kyntiew ïa ki jaka pule. La pyntip ruh ba ka jingtrei ïa ka jingtei ba thymmai jong ka College mynta ka dang ïaid shakhmat.
Nalor kane, u Myntri Rangbah u la ban biang ba ka jingkylla kam lah ban urlong noh mynta mynta hi, kumta u la pynpaw ba ka Sorkar MDA ka la trei shitom bad ryntih ban pynwandur biang ïa ka jingbym shimkhia kaba la neh da ki phew snem na ka bynta ban kyntiew ïa ka distrik.