Ka BJP ka kren halor ka jingpynkup bor ïa ki kynthei katba ka pyntroin ïa ka kamai kajih: Lhingkim Haokip

Shillong, K’Lyngkot 21: Ka General Secretary ba dang shu shah thung shen jong ka All India Mahila Congress (AIMC) ba dei peit ia ka jylla Meghalaya ka Lhingkim Haokip kala ther tyngeh bad kynnoh ba ka sorkar Bharatiya Janata Party (BJP) ba la ïalam da u Narendra Modi ka wanrah ïa ki policy kiba long pyrshah ïa ki kynthei.
Haba ïa kren bad ki lad pathai khubor ha Congress Bhavan, Shillong ka Lhingkim Haokip kala ong ba ka sorkar ka kren ia ka jingpynkupbor ia ki kynthei, ki kam jong ka pat kila nang pyntroin ia ka jingkamai laitluid jong ki kynthei lyngba ka jingpynduh ïa ka scheme MGNREGA ne ka bylla shi spah sngi.
Kala pynbna ba ka Mahila Congress kan sa ïalam ban pynlong ïa ka jingïakhih ba jai jai, pynlong ïa ki awareness campaign bad rah ïakren ïa ki jingeh ki kynthei na ki shnong sha ki surok bad shaduh ka ïing dorbar Parliament.
Haba kren halor ka kam jong ka MGNREGA, ka Haokip kala ong ba ka Sorkar u Modi kala nang pyntroin ïa ka skhim, watla ka dei ka hok ba shong ain ban ioh kam bala pynthikna da ka Parliament.
“Ka MGNREGA ka dei ka hok, ym ka jingleh sngewbha.Ka jingpyntroin ïa ka MGNREGA ka dei ka jingthombor beit beit ïa ki kynthei, ki nongtrei bad ki nongkyndong ba duk” kala ong.
Ka Haokip kala ban jur ba ki kynthei ki dei ki nongtrei ba bun eh ha ka MGNREGA bad ïa ki kynthei riewlum bad nongkyndong, kane ka skhim ka dei ka tyllong ba kongsan ha ka kamai kajih, ka jingioh ïa ki jingbam tei met bad ka jingioh ïa ka burom.
Ka Haokip kala pyntip ba ka Mahila Congress kan ïai bteng ïa ka jingïaleh ban pyrshah ïa ka MGNREGA bad ïakhun pyrshah ïa ki policy ba buh ha ka jingma ïa ki kynthei, ki nongtrei bad ki briew ba duk.
Shuh shuh ka Hoakip kala ïathuh ba ka jingpynkiew dor jong kane ka sorkar ba la ïalam da u Modi dei ki longkmie kiba mad ïa ka jingeh ba khraw bad khamtam eh ha ka jingkiew dor u tyndong lyer shet, hynrei tang shu jan ka election ki pynbiej ïa ki paidbah da kaba pynhiar dor ïa kaba kum kane ka AIMC kan ïakhun tyngeh na ka bynta ki long kmie jong ka ri India hi baroh kawei.
Na ka liang jong ka kong Jop Shylla kaba dei ka President jong ka Meghalaya Pradesh Mahila Congress Committee haba kren halor ka MGNREGA kala ong ïa kane la sdang 20 snem mynshwa ha ka por ba dang long Myntri Rangbah U Manmohan Sing bad ki paidbah ioh ïa ka hok ban trei ha nongkyndong.
“Ka BJP ka kwah ban pynkylla ïa ka MGNREGA bad pynbiej ïa ki paidbah ban pynkiew sha ka bylla 125 sngi bad kane ka scheme BJP la shu jied briew ym ban ai salonsar, bad ym lah ban pankam, mynta ki thmu ban pyniaid ïa ki kam bylla da u contractor bad un rai ma u ïano un ai bad kane kan ktah ïa ki longkmie namar ba la shah knieh noh ïa ka hok” kala ong.
Kan long ka jingduh bad ka jingeh ba khraw na ka bynta kito ki longkmie kiba ym don kpa shuh namar ba ka kamai kajih ne ka ioh ka kot kala hiar bad halor kane ngin pyrshah ïa kane ka jingleh ka sorkar BJP, ong ka kong Jop.