Hapdeng ki ummat kiba sngewsih, la tep don burom ïa ka met basah jong u (L) Rev. Dr. R R Cunville

Shillong, Kyllalyngkot 20: Ïa ka met basah jong u Rev Dr Rieweh Robert Cunville la tep don burom ha ka sngi Baar ha u Lum Jingtep ka Balang Presbyterian Laitumkhrah, ha Lawjynriew ha kaba da kiba bun byllien ngut ki paidbah ki la wan ban ïa sngewlem ha kane ka sngi.
Ha kane ka sngi ha ka por mynstep la sdang shwa ïa ka jingïaseng ha ka ïingsah jong u Rev Dr Cunville kaba don ha Upper Lachumiere bad hadien kane la rah ïa ka met u Rev Dr Cunville sha ka ïingmane jong ka Balang Presbyterian Laitumkhrah ha kaba la pynlong ïa ka jingïaseng kyrpang kaba la pynïaid da u Moderator ka KJP Synod Pdeng u Rev T Khongjee.
Ha ka jingïaseng la ïoh ïa ka jingkren na ka Dr Elaine Duncan kaba mihkhmat ïa ka United Bible Society, u Roy Graham na ka Billy Graham Evangelistic Association, na ka Presbyterian Church of India, ka KJP Synod Pdeng bad u Secretary ka Balang Presbyterian Laitumkhrah u T.bn C Diengdoh ula ai jingkren halor ka histori shaphang u Rev Dr RR Cunville ha ka jingshakri ïa u Blei bad ïa ka Balang bad khamtam ha ka jingleit ban ïalap ïa ka ktien u Blei sha kylleng satlak ka pyrthei.
Ha kane ka sngi ha ka jingïaseng la ïoh ruh ïa ki jingrwai na ka Choir ka Balang Presbyterian Laitumkhrah bad na u Rev Terence Wanshong bad la sakhi ruh ba kane ka Ïingmane kala dap smam da ki riewngeit, ki heh ki haiñ, ki nongïalam jong ki Balang bapher bapher bad kiwei kiwei kiba la wan na kylleng ka ri India bad ki ba nabar ka ri.
La rah ïa ka met jong u Rev Cunville sha u lum jingtep ha Lawjynriew bad hangne la pyndep ïa ka lehniam lehrukom bad la tep donburom ïa une u nongïalam niam uba pawnam ha ka ri India bad ha ka pyrthei baroh kawei.