Shillong, K’lyngkot 20: Palat 800 ngut ki samla wad kam ki la wan ban ïashim bynta ha ka National Institute of Electronics & Information Technology (NIELIT), Shillong ha ka jingïatreilang bad ka Ophis Divisional Employment Exchange ha ka sngi Ba-ar, ha kaba ki la pynlong ïa ka NIELIT Shillong Job Fair 2026 ha Soso Tham Auditorium. Halor kane, ha kane ka sngi la ïohi ruh ba 18 tylli ki Company kila phah ïa la ki jong ki briew kum ki nongjied (recruiter) ïa ki samla wad kam wad jam.
Ha kane ka Job Fair kaba shi sngi ka kynthup ka On-spot Interviews, Career Counseling bad Employer Presentations kiba ai ïa ki kam ha ki IT & Hardware, Security Services, Education, Automotive, Wellness bad Staffing Services.
La ong ba ki company kiba khring ïa ki samla wad kam ki kynthup ïa ka Eastern Panorama, Vision Plus Security Control Pvt. Ltd., ka Ascensive Educare, bad ka Techsoul, nalor kiwei pat.
Katkum ka kyrwoh khubor la ong, “Ka jingwan shim bynta ki samla wad kam ha kane ka sngi ka la palat ïa kaba la khmih lynti bad ka pynpaw ïa ka jingkhlaiñ jong ki samla kiba tbit ha ka thaiñ.”
Ka kyrwoh ka ong shuh shuh, “Ki jingïalang kum kine ka pynïajan hapdeng ki samla wad kam bad ki nongai kam, ka pynsted ïa ki jingpynrung kam. Ngi shimkhia ban bteng ïa kum kine ki jingpyrshang ba ïatreilang ban pynthikna ïa ki lynti treikam kiba neh na ka bynta ki samla jong ngi.”
Ki nongai kam ki pyntip ïa ka jingwan jong ki kyrtong kiba tbit bad ki la ïaroh ïa ka jingpynbeit jong ka jingïalang bad ka jingpynkhreh ïa ki kyrtong wad kam.
Ha ka jingïalang la pynpaw ïa ka jingdonkam jong ki jingïatreilang ha ka thaiñ ha kaba ïakhun pyrshah ïa ka jingbym donkam bad ki jingthmu ban pyntbit ïa ki sap jong ki samla ha ki rukom bapher bapher.
Shuh shuh ka kyrwoh na ka NIELIT Shillong ka la ong ba ka thmu ban pynlong ïa ki jingïalang buddien bad ki jinghikai ba la thmu ban ïarap ïa ki kyrtong ban pyndep ïa ki jingdonkam ba kyrpang jong ki nongai kam ba la ithuh ha ka por ba pynlong ïa ka Job Fair.
