Shillong, K’ Lyngkot 20: Dang hadien katto katne bnai ba u MLA ka West Shillong Constituency u Bah Paul Lyngdoh ha ryngkat lang bad ki engineer, ki ophisar ka Shillong Municipal Board bad ki Nongïalam shnong bapher bapher ïa ka surok ka ban leit sha Paltan bazar na ka bynta ban pynbha ïa ki pipe um, nangta ka surok bad ki jingshna ïa ki nala, haduh mynta la lap ba katei ka jaka ka dang long kumjuh.
Lah ruh ban pynkynmaw ba ha kitei ki bnai ba la leit jurip da u MLA na ka liang ki ophisar ha ka jingïalang ba Lyngkot ba la pynlong hadien ka jingleit jurip, ki la kular ba tang shu la wan ka aïom tlang ïa ka kam kin sdang noh hynrei haduh mynta kane ka dang long kumjuh.
Kaei kaba isangsot eh ka long ka jingjaboh jong kane ka jaka bad ka surok kaba shu dap beit tang da ka um ktieh kaba ïong kaba isaitmet shisha ban peit.
Manla ka sngi bad baroh shisngi kane ka surok ka shu shlei beit da ka um ktieh kaba mih na ka nala kaba ka um ba jaboh ka wanmih napoh Ïewduh bad na ka daw jong ka jingsah kut ki jaboh, ka um kaba ïaid na kane ka nala kam lah satia ban tuid beit na ka nala kumta ka la tuid beit sha surok ba ïaid kali bad ka la pynlong ruh ïa kane ka jaka ba kan shu sma iwtung beit baroh shisngi.
Ha kane ka surok ka don ruh ka jaka pynlang ñuit jong ki jaboh jabaiñ kiba la lum na ki basa bapher bapher napoh Ïewduh, kumta kane ka jaka ka la kylla long kaba jaboh bha.
Kumta lada ki bor badei peit kumba ki la kular kim lah ban pyndep kan dang wanrah shuh shuh ka jingeh, khamtam ïa ka khuid ka suba bad ka koit ka khiah naba bun na ki pipe um kiba pei ki ïaid napoh kane ka nala.
