Rai pynrem ka ïingbishar 4 ngut ki runar, 2 ngut shi jingim ha phatok ba thombor ïa ki kynthei

Shillong, Kyllalyngkot 19 : Ka ïing Bishar jong ka Nongbishar B Khriam Special Judge (POCSO) East Jaintia Hills Khliehriat ka la rai pynrem ïa saw ngut ki runar kiba donkti ha ki kam runar pyrshah ïa ki kynthei khynnah bad na kine arngut ki ngat ha ka kyndon aiñ POCSO bad arngut pat ki shah rai pynrem ban shah set phatok shi rta jingim.
Kine ki sawngut ki dei u Apurba Das,Pynkloide uba la tip kum u Deibor Phyrnge, Sanjay Das bad Ramesh Dkhar.
Hadien ba ka Khliehriat Women Police Station ka la ïoh ka jingujor pyrshah ïa u Apurba Das, la rejister case ha ka kyndon aiñ POCSO bad la aiti ha ka SI O Nongtdu ban tohkit bniah. Hadien ka jingtohkit bad jingpynngat kyndon, la tian bishar bad hadien ka jingbishar ka Nongbishar B Khriam ka la rai pynrem ïa u Apurba Das da kaba un hap shong phatok san snem kynthih ryngkat ka kuna kaba 10 hajar tyngka. Sa kawei ka kyndon POCSO kaba u Apurba u ngat ka long ban shong phatok sa 3 snem ryngkat ka kuna ba 5 hajar tyngka.
Kumjuh ruh hadien ba ka Khliehriat Women Police Station ka la ïoh ka jingujor ka la rejister case bad aiti ha ka WPI O Tyngkan ban tohkit bniah. Hadien ba la dep tohkit bad pynngat kyndon la tian bishar bad ka ïing Bishar jong ka Nongbishar B Kriam ka la rai pynrem ïa u Ramesh Dkhar da kaba un hap ban shong phatok shirta jingim ryngkat ka kuna ba 10 hajar tyngka.
ïa u Sanjay Das ruh hadien ba la rejister case ha Khliehriat Police Station la aitip ban tohkit ha Insp.L Lyngkhoi. Hadien ka jingtohkit bniah la pynngat kyndon bad la tian bishar ïa u. Hadien ba la dep bishar ka Nongbishar B Khriam, Special Judge East Jaintia Hills ka la rai pynrem ïa u da kaba un hap ban shong phatok shi rta jingim ryngkat ka kuna ba sanphew hajar tyngka.
Ha kawei pat ka jingshong bishar halor kawei ka jingjia ba la ujor ejahar da ka kong Agnes Rabon ha ka 9 tarik Risaw 2024 ka dei halor ka jingjah rngai ka khun ksiew jongka ha ka 7.10.2024 ha ka por 6.30 na ka dukan ba don ha ïing ha Umpleng, East Jaintia Hills. Ha ka jingwad ïa kane ka khynnah la lap ïa ka ha ka step kaba bud. Kumta ki pulit ka Khliehriat Women Police Station ki la register case bad la aiti tohkit ha ka WPI O Tyngkan. Hadien bala dep tohkit bad pyngnat kyndon la tian bishar bad hadien ka jingbishar ka ïing Bishar jongka Nongbishar B Khriam, Special Judge (POCSO) East Jaintia Hills ka la rai pynrem ïa u Pynkloide uba la tip kum u Deibor Phyrnge ba u donkti ban pynjah miet ïa katei ka khynnah. Kumta ka Nongbishar ka la rai ba un shong phatok lai snem kynthih ryngkat ka kuna ba 5 hajar tyngka.