Nongpoh, K’Lyngkot 19: Uwei u rangbah naka thaiñ Nongpoh, u la lap ïa kawei ka metiap jong kawei ka longkmie kaba la sdang ban pyut ha kawei ka bynta ba long khlaw haka dong Lumsohphoh ba hap haka shnong Nongpoh bad mar mar u la pyntip sha ki bor pulit ka Nongpoh PS ban leh ïa kaba donkam.
Naka liang ki pulit mar sien ioh jingtip halor kane ka jingjia kila hiar mar mar sha katei ka jaka ban pynlong ka jingtohkit ryngkat ki nongtrei ka Forensic Crime Scene Unit bad hadien bala pyndep ïaki jingdonkam baroh la pynkit noh ïa katei ka metiap jong katei ka longkmie sha Nongpoh Civil Hospital Nongpoh.
Shuh shuh la lap ruh ba katei ka longkmie ka dei na kawei pat ka shnong ba marjan bad hadien bala pyntip sha ki bahaiing, naka liang jong ki kila ithuh ïaka lyngba ki jingdeng ba katei ka longkmie ka deng bad la ioh jingtip ruh ba katei ka longkmie kala phet nala ïing bad kam kwah shuh ban leit phai wat hadien ka jingpyrshang jong ki bahaiing ban khroh bad ban khot ïaka bad ka dei ruh ka longkmie kaba ju dih buaid.
Naka liang ki bahaiing kim don kano kano ka jingtharai sniew halor kane ka jingjia hynrei naka liang ki pulit ki dang leh ïaka post mortem ban pyndep ïaka jingtohkit katkum ki kyndon aiñ.
