Shillong, K’ Lyngkot 19: Ka kynhun Pulit jong ka Sorkar Pdeng, Central Reserve Police Force kaba don ha kane ka Nongbah Shillong kaba dei na ka 67 Batallion ha ka sngi Nyngkong ka la sdang ïa ka jingpynsngewthuh paidbah haba ïadei bad ka jingrakhe ïa ka jingdap 150 snem jong ka jingrwai Vande Mataram.
Ïa ka jingrakhe ïa kane ka jingdap 150 snem kane ka jingrwai Vande Mataram ba la thoh da u Bankim Chandra Chatterjee ha u snem 1875, kane ka kynhun pulit CRPF kaba 67 kan rakhe burom saw sngi lynter ïa kaba la sdang mynta ka sngi ban rwai ïa kane ka jingrwai hakhmat ki paidbah da ka kynhun nongtem jong ki kynthei ha Khyndailad.
Kane kajuh ka kynhun nongrwai, kan pynlong sa ha kiwei kiwei ki bynta jong kane ka Nongbah Shillong ban rwai ha ki rukom rwai bapher bapher jong kane ka jingrwai Vande Mataram. Ha kane ka sngi ki paidbah kiba ïaid ba ïeng ki la ïa ïeng ban sngap ïa ka jingrwai ieid la ka Ri kaba la rwai ha ka por jong ka jingïaleh laitluid na ka jingsynshar ki nongwei.
Uwei na ki heh Pulit jong ka kynhun CRPF u la ong ba la pyntikna ba kane ka jingrakhe burom ïa ka jingdap 150 snem ka jingrwai Vande Mataram yn rakhe saw sngi lynter ha kane ka Nongbah Shillong bad ïa kum kine ki jingrwai yn pynlong ha ki jaka bapher bapher kane ka Nongbah ka Jylla Meghalaya bad ha kiwei pat ki rukom rakhe ïa ka.
