Nongstoiñ, K’lyngkot 19: Ka Banarig Foundation ryngkat ka jingïasnohktilang bad ka Meghalaya Tourism, kan pynlong ïa ka Tamasa kaba la ai kyrteng ruh kum ka Sngithiang Festival 2026 ha madan New Nongstoiñ.
Ïa kane ka Tamasa yn pynlong haduh ar sngi lynter kata naduh ka 23 tarik u Kyllalyngkot 2026 haduh ka 24 tarik u Kyllalyngkot 2026. Ha katei ki ar sngi yn don ruh shibun ki jingpynbyrngia kiba kynthup naduh ka jingïakop shad, ka jingïakop rwai, ka Calisthenics, ka jingïakhun kti, jingïakop shna phlim lyngkot, jingïakop shon dur bad kiwei kiwei.
Ha katei ka Sngithiang Festival kan ym don kano kano ka bai rung bad yn ym shim bai rung ruh ïa kiba kwah ban ïashimbynta ha kitei ki jingpyni nam ne ki jingpynbyrngia bapher bapher lyngba ki rynsan bapher bapher.
Yn wan ruh ban rwai kyrpang da ki kynhun rwai ba pawnam jong ka jylla kiba kynthup ïa ka Thunders Cave, ka Jessie Lyngdoh bad kiwei kiwei bad ha kajuh ka por kan don ruh ka jingïakop thei bhabriew kaba yn ai nam kum ka Miss Sngithiang 2026.
