Satang da ka ding ne ka snam ban wanrah ki jingpynkylla ki rukom treikam ka MPSC, ong ka KSU

Shillong, K’ Lyngkot 19: Na ka por sha ka por ki nongialam jong ka Khasi Student’s Union ki la leit ban ïakynduh ïa ki nongpeit bad nongpynïaid ne ki Chairman jong ka Meghalaya Public Service Commission ban dawa ba kin pynbeit ïa ki rukom thoh eksam bad ka rukom thungkam thungjam jong ki samla ha kane ka jylla bad ba kan long kaba khuid kaba suba ban lait na ka jingleh tuh bad ka jingleh shilliang.
Ha ka sngi Nyngkong ka KSU lyngba ka Employment and Monitoring Cell hapoh ka jingïalam jong Assistant General Secretary u Reuben Najiar ki la leit ban kynduh ïa u Bah D Langstang Chairman ka MPSC ban ïakren biang ïa kito ki phang kiba la sah teng naduh ki por kiba mynshwa.
Hadien ka jingïakynduh bad u Chairman ka MPSC u Samla Najiar u la ong ba na ka liang ka seng ha kane ka kynti kaba mynta ka la thait ban ïakren ïa kajuh shi kajuh ka mat naba la shu ïakren shi ïakren bad la shu ai shi ai dorkhas hynrei ka jingkylla kam don satia bad kane ka kynti kaba mynta ka KSU ka la aipor shi taïew ïa ka MPSC ban pyntreikam ïa ki mat jingdawa jong ka seng bad kumba ka long mynta ka long ba watla mar shiteng na ki 20 tylli ki mat jingdawa jong ka seng la pynrung hapoh ka Reform Committee ba la thaw da ka sorkar hynrei na ka liang ka MPSC kam pat shym la pyntreikam satia ïa ki, kumta ha kane ka kynti la donkam ban wanrah ïa ka jingkylla noh lyngba jong ka ding bad ka snam.
Ha kaba ïadei bad kane haba kren sha ki lad pathai khubor u Chairman ka KSU Employment Monitoring Cell u samla Reuben Najiar ula pynpaw ba watla ïa ka kaiphod ka Committee la aiti naduh u Nailar 2025, ym pat don satia kano kano ka jingkylla kaba la pyntreikam, kaba la pynbor ïa ka Union ban ïakynduh ïa u Chairman ha kane ka sngi. U Samla Najiar u la ong, “U Chairman ula ong ba ka Commission ka dang bishar bniah ïa kane ka kam, hynrei kam don eiei satia ban bishar ïa ka. Ki jingai jingmut ki dei ïa kaba ka MPSC kan pyntreikam.”
Halor kane u samla Reuben u la pynpaw ruh ïa ka jingbym sngewtynnad halor kane ka jingpynslem jong kane ka jaka treikam sorkar.
Halor kane u la ong, “Ngi la aipor shitaïew ïa u Chairman ka MPSC ban pyntreikam ïa ki jingpynkylla kiba ïadei bad ka jingpynlait paidbah ïa ki marks bad kiwei kiwei ki jingpynkylla kiba don ha ka kaiphod khnang ba kan don ka jingtreikam kaba shai ha ka jingpynïaid ïa ka thungkam thungjam namar ïa mynta ngi lah ïohi ba kam don satia ka jingshai ha ka thungkam thungjam.”
Na ka liang jong u, u la pynpaw ba ka KSU ka la dawa ban pynlait paidbah ïa ki marks, ka eksam da ka objective-type na ka bynta ki kam Grace-C bad D bad ba ki jingpynbna laitkam ki dei ban long tang ïa ki nongshong shnong ka Meghalaya.
Haba kynthoh ïa ka MPSC ba ka wanrah ïa ki policy bapher bapher ban pynïaid katba mon ïa ka eksam, u samla Reuben ula pynpaw, “Kawei na ki nuksa ka dei ka eksam typist kaba lah pynlong ha u bnai Naiwieng 2025. Ngi la ïohi ba ha kiba bun ki khep ïa ki eksam Grade-C bad D, ïa ka eksam lah hap ban leh lyngba ki jingkylli ba lah ban jied (multiple choice) bad ka eksam dei ban leh da ka objective-type hynrei ha kane ka kynti, ki la pynleh da ka descriptive type bad balei ki leh ïa kane khnang ba kin lah ban ai marks kat kaba mon.”
U Samla Najiar u la ong, “Shu buh lada pynlong da ka objective-type, lada ki don 50 tylli ki jingkylli bad phi dei ïa 20 tylli ki jingkylli, yn ym don mano mano ruh ba lah ban pynkylla ïa ki marks hynrei ha ka descriptive type pat ka shong ha u examiner la un ai ïa phi 10 lane 30 lane kano kano ka marks kat kaba u mon bad ym don ïingkashari kiba lah ban tuklar ïa kane ka kam. Kumta ki kwah ban ai marks kat kaba ki mon khnang ba kin lah ban thep kam ïa la ki jong ki briew.”
Halor kane u samla Najiar u la bynrap, “Ngi la pyrshah ïa kane bad kum kane ka jingleh yn ym lah ban pdiang. Kawei ruh ka long ba ki jingpynbna laitkam nangne shakhmat kam dei shuh ban long ïa ki nongshong shnong ka ri India hynrei ka dei ban long tang ïa ki nongshong shnong ka Meghalaya bad ïa kane lah ju leh ha baroh ka thaiñ Shatei Lam Mihngi naba ki kam ha Jylla ki dei kiba la mang tang ïa ki nongshong shnong jong ka Jylla ym ïa baroh kawei ka ri.”
Ha kaba ïadei bad kane u nongïalam ka KSU u la ong ba ka seng ka suba ba ka jingbym kwah jong ka MPSC ban pyntreikam ïa ki jingpynkylla ka mih na ka jingkwah ban pynneh ïa ka jingbym shai ha ka thungkam.
U la ong, “Ba kim kwah ban pyntreikam ïa kine ki jingkylla lane ki jingpynkylla namar ki long kiba biang bad ka rukom treikam kaba mynta, kaba la bamsap bad kaba lah ban pyndap ïa la ki jong ki kyrtong katba ki kyrtong kiba biang bad kiba don jingkyrmen kim ïoh kam katba ki briew kiba don jingïadei bad ki briew kiba lah ban siew ïa ka pisa kaba heh ki ïoh kam. Ki briew kin tip ïa ki marks jong ki bad katno ki ïoh ha ka interview bad ki briew kin sdang ban buh jingkylli, mano ba thoh ha ka eksamin, mano ba ïoh ïa ki marks kiba kim tip, ki tip tang hadien ba la pynmih ïa ka result bad kine ki dei ki kyrteng kiba la pass hynrei kim tip wat lada ki leh RTI ruh kin ym ïoh satia. Na kata ka daw ki artatien ban wanrah ïa kine ki jingkylla namar lada ki leh kan sa don ka jingpynrung kam kaba shai.”
Halor kane ka KSU ka la byrngem ban pynlong da ka jingïakhih lada ym pyntreikam noh ïa kine ki jingpynkylla ïa ka jingtreikam ka MPSC hapoh ka shitaïew.
U Samla Najiar u la ong, “Lada ka Commission kam lah ban pyntreikam ïa kine ki jingpynkylla, kan pynbor ïa ngi ban shim ïa ki sienjam kiba tyngeh, kynthup ka jingpynsangeh ïa ka jingpynïaid ïa ki eksam thungkam thungjam tad haduh ban da wanrah ïa ka jingkylla.”