ïoh kem ki pulit 5 ngut ki nongkhaïi ksiar tuh bar ri, kurup 817gm bad 27 lak ka pisa

Shillong, Naitung 9 : Ki Pulit jongka Meghalaya ki la lap dien bad ïoh kem ïa ki san ngut ki briew kiba donkti haki kam khaïi ksiar tuh bar ri. Kine kiba la shah kem ki dei 2 ngut na Meghalaya bad lai na Assam bad na ki la ïoh ban kurup 817 Gram ka ksiar bar ri bad 27 lak tyngka ka pisa. ïa kine la ïoh ban kem naduh ka 24 tarik Jylliew 2022 hynrei ki pulit ki khlem pyllait khubor namar ki dang tohkit bad bud dien ban ïoh kem ïa kiwei kiba donkti lang.
“ Ngi la ïoh ban kurup hynniew tylli ki biskit ksiar kiba khia 117 gram kawei kawei . Ngi la ïoh jingtip ba kane ka kynhun ka khaïi ksiar tuh na Bangladesh sha Meghalaya bad na Meghalaya sha Guwahati bad shaduh Siliguri bad kiwei kiwei ki bynta ka ri India” ïathuh u Director General of Police (DGP U L.R Bishnoi sha ki nongthoh khubor mynta ka Sngi Saitjaiñ.
U la ïathuh ba kane ka ksiar ka dei kaba na United Arab Emirates (UAE) bad ka ïaid lyngba ka Bangladesh ban ïoh rung sha India.
“ Na ka jingtohkit bniah ïa kine ki briew ngi la ïoh sngewthuh ba kine ki ksiar kim dei kiba na Bangladesh hynrei ki dei kiba wan naduh UAE bad ki sa poi sha India. Ka dor jong kane ka ksiar ha UAE shi gram ka long 4410 tyngka ha Bangladesh 4600 tyngka shigram bad ha India 5121 tyngka shi gram.
U DGP u la ïathuh ba ki nongkhaïi beaiñ mynta ki kham noh ban khaïi ïa ka ksiar ban ïa u drok bad ka pisa thok jongka India phla sa ki arngut kiba la ioh bat da ki pulit Assam kham hadien bad tohkit bniah ïa ki.
Na ki kot ki sla ba la ïoh kurup na kine ki nongkhaïi beaiñ kane ka kynhun ka thmu ban pynrung haduh 400 ngut ki khynnah samla nangne na Shillong ban pyndonkam ha ka jingkhaïi ïa u drok bad ka ksiar tuh bad ka jingthmu jongki ka long ban pynbiej bad pyndonkam ïa kine ki samla kiba khlem kam khlem jam ban leh ïakine ki kam beaiñ, ong u DGP.
U DGP u ïathuh ruh ba na ka jingtohkit la sngewthuh ba u khlieh duh jong kane ka kynhun khaïi ksiar, drok bad pisa beaiñ u rieh tngen ha Bangladesh bad na katei ka ri u pynïaid ïa kine ki kam beaiñ. “ Hooid wat la kim ïathuh bniah shaphang jongu hynrei na ka jingphla jong u ki pulit ki la sdang lap ksai hi malu mala. Ki don sa ar ne lai ngut kiba dang paw kyrteng kiba ym dei na Meghalaya ne Assam ruh bad ka jingbud dien ban ïoh kem ïaki ka dang ïaid shakhmat.
Hadien ba ki pulit ki la ïoh jingtip kaba thikna ba ki don ki kynhun kiba kit ïa ki ksiar tuh na Shillong sha Guwahati ha kateik a 24 tarik Jylliew 2022, ki pulit ki la pynlong ka jingpynap shrip ha surok bah ha Nongpoh hajan ka Police Station.
Ha ka jingtalasi ïaki kali ki pulit ki la ïoh bat ia u Abu Bakkar uba dei na Barpeta Assam bad lap ba u rah 24 tylli ki biskit ksiar bad ki khia haduh 0.8 kilo bad shongdor kumba 50 lak tyngka.
Haba la pan ïa ki kot ki sla une u briew um lah ban ai bad kumta la bat bad tohkit ïa u. Dei ha ka jingtohkit ba ula phla ba u thmu ban leit ai ïa kine ki biskit ksiar sha u Addique Ali bad Sahjahan kiba na Barpeta hi, ïathuh u DGP.
La pynlong ka jingleit khynra sha Barpeta da ki pulit ka Meghalaya bad ïatrei lang ki pulit Assam bad la ïoh ban kem ïa kine baroh arngut bad kurup ïa katei ka pisa 27 lak na ki. Hadien kane ki pulit kila ïoh ban kem sa anrugt na Shillong kata u Aziz Lyngdoh na Laban bad Subalin Kharbani na Mawlai. La ïoh ruh ban kurup 10 tylli ki mobile phone, saw tylli ki ATM Card na kine ki briew. Kine ki phone dei ba ki pyndonkam ban ïakren para nongkhaïi beaiñ.