Plie pyrda u Myntri ïa ka jingïalehkai Basketball ka Seng Samla CMC Iawmusiang-Khimusniang

Jowai, K’lyngkot 19: U ma Wailadmiki Shylla, uba dei ruh u myntri ka tnat jong ka Health & Family Welfare, Sports and Youth Affairs, mynta ka sngi 19 tarik Kyllalyngkot u la plie pyrda ïaka jingïalehkai Basketball Tournament 2026, kaba la pynlong da ka Seng Samla CMC Iawmusiang –Khimusniang, haka jingïatreilang bad ka SYM. Ïa kane ka lympung ïalehkai Basketball la pynlong ha Joseph Nardiny Seminary Ummulong, kum shi bynta ban kynmaw burom ïa ka (L) Lily Mary Laloo.
U ma Wailad haba ai jingkren ha kane ka sngi u la ïaroh u ïa ka seng Samla CMC Iawmusiang–Khimusniang, kaba la lah ban pynlong ïa kum kane ka jingïalehkai kaba ai jingmyntoi shibun ïa ki samla ha ka liang ka sports. Na ka liang jong u ma Wailad u la kitbok kitrwiang ïabaroh ki nongkit kam ka seng bad kumjuh ruh ïa ki kynhun bad ki players ba wan ban ïa shim bynta ha kane ka lympung. Shuh shuh ula kyntu kynpham ïa ki players ban kin practice bha nangne sha khmat, namar ba ha u snem 2027 yn don ka National Games, ka ban long ka kabu ksiar ïa ki players ban ïoh ïashim bynta ha kane ka National Games. Ha kane ka sngi u ma Wailad u la noh synñiang ruh haduh shi lak tyngka sha ka seng.
U Rudolf Laloo, u ba dei u khun rangbah jong ka kong (L) Lily Mary Laloo, haba ai jingkren u la ong, kane ka lympung ïalehkai basketball kam dei tang shaphang ka jingïalehkai, hynrei ka dei shaphang ka jingieit, ka jingkynmaw burom bad ka jingïatylli. Ngi pynlong ïa kane ka lympung ïalehkai da ka jingsngew sarong ha ka jingkynmaw burom bad ka jingieit ïa ka kmie jong ngi kaba la khlad noh, ka Lt. Lily Mary Laloo, kaba la long ka briew kaba ïaineh, kaba jingïasyllok sngewbha bad kaba ai mynsiem ïa ngi man la ka sngi.
Ha kane ka sngi la donlang ruh u District Sports Officer (DSO) West Jaiñtia Hills District ma Khroobok Passah, Fr. Anthony Kharkongor (SYM), uba la synñiang ruh 50 hajar tyngka sha ka seng Samla, ladon lang u Most. Rev. Ferdinand Dkhar Bishop ka Jowai Diocese, kiba ha ïing ha sem ka kong (L) Lily Mary Laloo naduh u khun rangbah jong ka u Rudolf Laloo, Fr. Lambert Dkhar, Rector Joseph Nardiny Seminary Ummulong, Fr. Lawrence R Paswet DYD, ki nongkitkam ka seng Samla Parish, ki nongkitkam ka Parish Pastoral Council Jowai bad kiwei de ki riew rangbah ba la donlang ha kane ka sngi.
Ka jingïalehkai mynta ka sngi sdang jong kane ka lympung ka la long hapdeng ka JNR B ha kaba ka Wizard ka la jop da 51 baskets pyrshah ïa ka JNR B kaba la ïoh tang 39 baskets.
Ha kane ka lympung la wan ban ïashim bynta 9 tylli ki kynhun, kiba kynthup 5 tylli na Shillong bad 4 tylli na Jowai.