Shillong, Naitung 09 : U MLA ka Mawhati Constituency, Bah Dasakhiat Lamare ba dei ruh u Myntri jong ka tnad Transport jong ka sorkar jylla, u la ïathuh ba shen ka kompani kan sdang noh ban shna ïa ka surok na Umsning-Jagi Road kaba don 40 kilometer ha ka jinglut jingsep kaba kot 114 Klur na kabynta ka jing myntoi ïa ki paidbah ka Mawhati Constituency.
“Nga dap da ka jingkmen ban pynbna sha ki paidbah ka Mawhati Constituency bad lah dep ban mang, ban shna noh ïaka Umsning-Jagi Road kaba la sah khongreng mynta la palat 40 snem eiei ha kaba kam shim la don kano kano ka jingmaramot ne jingshna thymmai. Lada ka suiñbneng ka ailad, shen ka kompani kan sdang noh ban shna thymmai ïa katei ka surok,” u la ong.
Ha kajuh ka por u la pynpaw ruh ïa ka jingsngewnguh ïa ka tnad PWD bad ruh ïa ki heh sorkar kiba la shimkhia ïa ka kam ban pynïoh ïa ka jingmang tyngka kaba 114 Klur ban shna ïa katei ka surok Umsning-Jagi Road kaba la ïaid lyngba ka Mawhati Constituency
“Nga pan map na ki paidbah ka Mawhati Constituency ba ngi la ïakhun naduh u snem 2018 bad mar syn pynjop ïa nga ha ka elekshon MLA, kadei ka surok kaba nyngkong eh kaba nga la phah ïa ka jingtyrwa hynrei na ki daw bym lah kiar kala sahteng noh, hynrei kumba ngi la angnud bad ïa trei shitom hi baroh, mynta kan urlong noh bad kum u MLA nga dap da ka jingkmen, watla kila don ki por ba ngi la duh mynsiem ban ïoh ïa ka surok kaba thymmai,” u la bynrap biang.
Shuh shuh u ong ruh ba ka kompeni kaba ïoh ïa ka kam kan ïaleh ban pyndep ban tei thymmai ïa ka surok hapoh jongka 6 ne 7 bnai bad u kular ruh ba wat lada um ïaleh shuh ïa ka elekshon MLA na Mawhati namar un ïakhun noh na Nongkrem Constituency, un buddien pat ba katei ka surok kan urlong.
“Nga kyntu ïa ki paid nongshong shnong ba kim dei ban sheptieng hynrei ki dei ban ai ka jingshaniah ïa nga bad ngan buddien beit lada nga bunkam katno katno ruh ha Nongkrem.”
U la pynpaw ruh ïa ka jingsngewnguh ïa ki seng bapher kiba don ka jingsngewkhia ïa ka jingeh ki paidbah kiba ju wan ud wan nam ha u kum u nongmihkhmat shaphang ka jingsah khongreng katei ka surok bad mynta kane ka jingangnud jong baroh kan sa urlong noh.
