Nongpoh, Naitung 09 : Ka tnad ïada ïaki mrad khlaw, ka Wildlife Crime Control Bureau (WCCB), Guwahati ryngkat bad ki pulit ïada khlaw jong ka Loharghat Forest Range, Assam kila ïoh ban kem 2 ngut ki samla khasi na Ri-Bhoi District kiba la suba donkti ban shalan beaiñ ïaki bñiat hati haka jingleit khynra jong ki haka sngi Palei haka shnong Umshru ha Ri-Bhoi.
Naka liang ki shipai jong ka tnad Wildlife ka jylla Assam kila pynlong ruh ka jingkhynra dei hadien ka jingïoh jingtip kaba bñiah ba ki don ki samla kiba shalan beaiñ ïa ki bniat hati, bad ha katei ka jingleit khynra jong ki haka shnong Umshru ka tnad Wildlife kala ïoh ruh ban kem 2 ngut ki samla khasi bad ïoh kurup ruh 6 kilo ka bñiat hati ba don kumba 9 tylli.
Kitei ki 2 ngut kiba la shah kem haki tnad wildlife jong ka Assam ki dei kiba la tip kyrteng kum u Darishan Nongrum na ka shnong Nongwah Mawtamur bad u Edison Nongtri na Patharkhmah haka thaiñ Jirang.
Ïa kitei ki 2 ngut la rah noh da ki pulit Assam bad la pynngat kyndon ruh ïa ki bad ka jingtohkit ban lap shuh shuh ïa kiba donkti ka dang ïaid shakhmat.
