Thrang ka sorkar ban siew tulop ïa ki nongtrei GHADC ka dei tang ka jingtep eit miaw ïa ka bamsap: MP Tura

Shillong, K’ Lyngkot 18: U MP ka Tura u Saleng A Sangma u la ong ba ka jingleh jong ka sorkar ban siew ïa ki tulop jong ki nongtrei ka Garo Hills Autonomous District Council (GHADC) kam long satia kaba sngewkmen shaphang kane, naba kane ka pyni pynban ba ka Executive Committee kam lah ban pynïaid ïa ki kam ki jam jong ka district council.
U MP ka Tura u la ong ba u lah ban ïohi ba ka don ka jingthmu jong ka jingpyrkhat ka sorkar jylla ka bym shai ban siew ïa ki tulop jong ki nongtrei ka autonomous district council.
U la kylli la kane ka dei ba don mano mano ba pyrshang ban tap eit miaw ïa katto katne ki kam bam sap ba ka sorkar ka pynpaw ïa ka jingthrang ban siew ïa ki tulop jong ki nongtrei ka GHADC.
U MP u la ïathuh ba ka seng NPP ka la synshar hapoh ka GHADC naduh u snem 2013 tat haduh mynta mynne.
U Sangma u la ong ba ka sorkar pdeng ka la bei pisa na ka bynta kiba bun ki projek kam pynroi bad kumjuh ruh ka jingbei pisa kaba shisien ai ne ka one-time-grant sha ka district council bad kaei pat kaba la jia ïa kum kine ki jingïoh jingkyrshan.
“Ki District council ki dei ki jaka treikam ba laitluid bad ki hap ban pynïaid ïa ki kam ki jam dalade hi bad ba kin wad pisa hi dalade. Hynrei hadien ba ka sorkar ka la pynbna ba kan siew ïa ki tulop, kata ka mut ba ka Executive Committee ka la pulom ban synshar ïa ka district council,” bynrap u Sangma.
U la ong ruh ba ka jingsiew ïa ki tulop da ka sorkar jylla ka pyni ba ka NPP ka la pynpulom ïa ki jingangnud ki nongshong shnong ka Garo Hills.
Haba kdew ba ha Khasi Hills Autonomous District Council (KHADC), da kaba shai ka la kyntait ïa kane ka jingtyrwa jong ka sorkar jylla, u MP ka Tura ula ong ba wat na ka liang ka GHADC ruh ka ladei ban leh lang kumjuh.
“Ka Executive Committee jong ka Garo Hills ka la long kaba la tlot la swai shaba palat bad ki rukom pynïaid kam jong ki ruh ki la pulom lut,” u la bynrap.
U Sangma u la buh ruh ka jingkylli ba nangno kine ki pisa ki wan ne ba ki la ïoh ban siew ïa ki tulop jong ki nongtrei ka GHADC.