Ha ka phuh ka phieng la pynkut ïa ka Lympung ki khynnah- Sengkhasi Seiñraij ha Tuber Sohshrieh EJHD

Khliehriat, K’Lyngkot 18: Ha ka rukom kaba iphuh iphieng mynta ka sngi la pynkut noh ïa ka Lympung ki khynnah- Sengkhasi Seiñraij kaba 21 bad ïa ka prokram la pynlong ha shnong Tuber Sohshrieh East Jaiñtia Hills District ha kaba la wan ban iashimbynta lang da ki khynnah na kylleng sawdong ka ri Khasi-Jaiñtia
Ïa kane ka Lympung ki khynnah- Sengkhasi Seiñraij la pynlong ha ki ar sngi lynter kata naduh ka 17 tarik bad 18 tarik kyllalyngkot ha madan Nohsiang ha Tuber Shohshrieh bad kane ka lympung ba kyrpang na ka bynta ki heprit ka long hapoh ka jingpeit jingkhmih ki nonghikai jong ki shlem hikai Niamtre-Niam Khasi bapher bapher.
Ha ki ar sngi ba pynlong ïa ka prokram ki hep ba rit ki la mih rynsan bad pyni ïa ki sap ki phong jong ki ha ryngkat ki riam tynrai ba ishongkun shongkhia.
Ka Kong Delina Khongdup kaba dei ka Member National Commission for Women, ka la wan ban pynsngaiñ bad ai mynsiem lang ïa ki khynnah bad la ïa don ryngkat lang ruh u Myntri ka sorkar Jylla, u bah Wailadmiki Shylla, u MLA Khliehriat, u bah Kyrmen Shylla, u Deputy CEM –JHADC, u bah Lasky Rymbai, u Dolloi ka Elaka Jowai, u Doloi Puramon Kynjing, u President Seiñraij Jowai, u bah Hercules Toi lem bad ki riew rangbah kiba na ki tnat seng Khasi Seiñraij bapher bapher jong ka rilum Khasi-Jaiñtia.
Haba kren ha kane ka lympung jong ki khynnah, ka Kong Delina Khongdup ka la ai ka jingiaroh ïa ki nongïalam jong ka Seiñ Raij ki ba la lah ban pynlong ïa kaba kum kane ka prokram kaba kyrpang bad kiba la shim ïa ka jingkit kaba khia ha kaba lam lynti ïa ki khynnah na duh ba ki dang rit ha kaba ïadei bad ka bynta ba kongsan ba kin tip ïa ka niam ka rukom tynrai khnang ba kan neh pateng la pateng. Kala kyntu ïa ki khynnah bad ki samla ba kin bat kumjuh ruh ba kin ri bad sumar ïa ka jinglong kyrpang ka jaitbynriew Hynñiewtrep Hynñiewskum na duh ka niam ka rukom, ki riti, ki dustur khnang ba ka pateng kaba hadien kan tip ban bud ïa kaei kaba ki longdien mandien ki ïalam lynti.
Ka la ong ruh ba kane ka lympung ka dei ruh kawei na ki rynsam ban pynpaw sha ka pyrthei ïa ka jingitynnad bad jingkordor ka riam bad jingshad tynrai, ka Kong Khongdup kala kyrpad ïa u myntri ka sorkar Jylla, u bah Wailadmiki Shylla ba un pyrshang ha ka bor ba rit jong u, ban pynlong ïa ka prokram pyni riam bad shad tynrai, la ka long ka shad pliang, shad Suk Mynsiem ne kino kino ki jingshad tynrai ha kaba ki khynnah bad ki samla kin shad lang hajuh da ki phew hajar ngut kumba leh da ki Bodo hapoh Jylla Assam.
Ka Kong Khongdup ka la pynsngew ruh ïa ki kam jong ka National Commission for Women (NCW) kaba treikam na ka bynta ka bha ka miat jong ki longkmie bad ki kynthei kiba la kynjoh ïa ka 18 snem shaneng, ka la ong ba ka National Commission for Women ka long kum ka jingkieng hapdeng kaba pun lynti ïa ki longkmie bad ka sorkar bad ong ruh ba lada don kino kino ki jingeh, ki lah ban pan jingiarap da kaba phone ha u Helpline Number 14490 uba treikam ha baroh 24 kynta.
Ka kong Rikynti Lyngdoh kaba la mihkhmat na ka Seng Khynnah Mowtyrshiah ka la kren halor ka phang ‘I maya dustur riti, I kyrkhu iaka patein’, bad ka Heprit Ilariti Swer Seng Khynnah Mawkdok Pdeng Lum Khasi ka la kren halor ka phang ‘Ka akor burom ki hep barit’.
La pyn byrngia ïa ki paidbah kiba wan sha ka lympung da ki jingialehkai drama lyngkot, ki jingrwai, ki jingshad bad ka jingpule ïa ka ktien Tymmen bad la pynkup burom ïa ki nongjop kiba jop ha ki jingiakop bapher bapher.
Ha kane ka lympung ka la don ruh ka jingaiti ïa ka dongmusa da u Heprit Piwan Bang uba na ka Seng Khynnah Seiñraij Shnong Tuber Shohshrieh uba la ai ha u Heprit Dashankupar Nongrum Seng Khynnah Pdeng Lum Khasi Pyllun kaba dei ka tnat Seng Khasi ka ba long kum ka dak ban shimti ban pynlong ïa ka Lympung kaba 22 jong ki Khynnah Seng Khasi-Seiñraij.