Nongstoiñ, K’lyngkot 18: Ka Nongpyndeng Sport Social & Cultural Club, ha ka sngi saitjaiñ kaba dei 17 tarik Kyllalyngkot 2026, ka la ïoh ban plie pyrda ïa ka jingrakhe dap 50 snem lane Golden Jubilee jong ka Club kaba la seng naduh kham mynshwa hynrei kaba la register pat ha u snem 1976.
Lah ban kdew hangne ba ka Nongpyndeng Sport Social & Cultural Club, ka dei kawei na ki Club kaba la rim tam bad kaba la ïalam ban prat lynti kumno ban sdang bad kyntiew ïa ki kam ïalehkai Sport hapoh Nongstoiñ West Khasi Hills District, khamtam eh na ka bynta ka Football, Cricket bad kiwei kiwei ki jait jingïalehkai kiba la suh thied mynta ha ki samla jong ka dong ka thaiñ.
U MLA ka Nongstoiñ Constituency u Bah Gabriel Wahlang haba ai jingkren kum u kongsan ha ka sngi plie kaba la pynlong ha Dorbar Hall jong ka shnong Mawkhlam Nongpyndeng, u la ong ba ka jingdon jong ka NSS&CC ka la kyntiew shibun ïa ka sap ka phong jong ki samla ha ka shnong bad ka dong ka thaiñ naduh ki snem kiba la leit noh haduh kine ki sngi ba mynta.
Halor ka jingdonkam jong ka Sport Club ban kyntiew shuh shuh ïa ki kam ïalehkai bad kiwei pat ki kam ha ka imlang sahlang, na ka liang u MLA u la kular ban ai ka jingïatreilang na ka bynta ban pynïoh ïa ki scheme na ka sorkar bad u la noh synñiang ruh na ka bynta ka sport Club.
Katba na ka liang u Bah Methodios Dkhar, Minister ka tnad Food and Civil Supply, watla um shym la lah ban ïadon bynta lang ha katei ka sngi, hynrei u la phah ïa u kyrwoh kitbok na ka bynta ka Sport Club bad ai ruh ka jingïarap na ka bynta ka NSS&CC.
Ha katei ka sngi la pynshongkun bad pynphuh pynphieng ruh ïa katei ka prokram lyngba ki jingshad tynrai, ki jingrwai, ka Dancing Competition, ka Food Fest, ka Penalty Shoot out bad kiwei pat ki jingïalehkai pynbyrngia kiba la khring bad pynsngew tynnad ïa ki paidbah nongwan peit kai.
Kiwei kiba la sakhi ïa kane ka sngi plie pyrda jong ka jingrakhe dap 50 snem ka Club, ki long u Bah Dressar Marngar kum u symbud kongsan, u Myntri ka shnong Mawkhlam-Nongpyndeng u Bah Balentin Sohlang, u Secretary shnong Bah A.L Syiem, u Lyngdoh ka shnong u Bah F. Sohlang, u President ka NSS&CC u bah J.R Diengdoh, u Dr. L.L Mawsor, Secretary jong ka Club bad kiwei kiwei ki riew rangbah ryngkat ki nongshong shnong.
