Da ka Mission 10 ban kot sha ka 16 million dollar hapoh u 2032 buh thong ka sorkar MDA

Shillong, Kyllalyngkot 17 : Ka Cabinet Retreat ba 3 jong ka Sorkar Jylla ka la kut noh ha ka sngi Saitjain da kaba pynleit jingmut ban plie ïa ki lad ban kyntiew ïa ka ïoh ka kot ka Jylla lyngba ki buit treikam bad ki kabu hapoh ka Mission 10 khnang ban kot sha kata ka jingbuh thong 16 million dollar hapoh u 2032.
Haba ai jingkren, u Myntri Rangbah Conrad K Sangma ula batai ïa ka lynti jong ka roi ka par, haba ban jur ïa ka jingdonkam ban plie ïa ki lad ki lynti ha ki bynta ba kongsan kum ka kam jngohkai, ka rep ka riang, ka jingseng kam shimet ban pyntyllun shakhmat ïa ka jingkiew shaphrang ka Jylla.
Ula ban jur ïa ka jingkut jingmut jong ka Sorkar ban kynjoh ïa ka $10 billion economy ne ka ïoh ka kot ba $10 billion hapoh u snem 2028, kaban kiew sha ka $16 billion hapoh u 2032 bad buh thong ban kynjoh $100 billion hapoh u snem 2047.
U la pynpaw ba ka jingpynurlong ïa kine ki thong ba angnud ka dawa kham bun ban ïa ki thong ba thrang; ka donkam ïa ka jingïatreilang, ka plan ba lah ban leh ha baroh ki Tnad.
Ka jingïakren ka pynleit jingmut eh halor ka jingpynkhlaiñ ïa ka rep ka riang ka Jylla lyngba ki policy kiba thmu ïa kaei ka ban jam shakhmat, ki jingpynkylla ïa ka rukom treikam ha ki tnad, ka jingpyndonkam ïa ki technology ban pynkhlaiñ ïa ki nongrep ba kin ïai neh ha ka kam bad ka jingpynmih marrep.
Ka mat ïakren ba kongsan eh ka dei ka jingthaw ïa ka Meghalaya Agriculture Policy 2026, kaba thmu ban ai ïa ka lynti kaba bniah na ka bynta ka jingroi kaba neh ha ka rep ka riang ha ka Jylla. La ïakren ruh halor ka jingkyntiew ïa ka agro tourism kum ka lad kaba dang mih ban pynïapher ïa ka ïoh ka kot ha ki nongkyndong katba dang pyni ïa ki rukom rep ba riewspah jong ka Meghalaya bad ka jinglong jong ki jaka.
U Myntri Rangbah u la ban jur ïa ka jingpyndonkam ïa ki technology kiba thymmai ban tip lypa ïa ka jinglong ka suiñbneng bad ban pynduna ïa ki jingpang jong ki jingthung, ka ban pynkhlaiñ ïa ka jinglah ban ïakhun ïa ka jingkylla ka suiñbneng ha ka rep ka riang. Ka tnad Animal Husbandry & Veterinary kan thaw ïa ka plan ba kyrkieh ryngkat bad ki 171 tylli ki kynhun response team ban buddien bha ïa ka koit ka khiah jong ki mrad. U Myntri Rangbah ula pynpaw ïa ka jinglah jong kane ka tnat ban kyntiew ïa ka jingpynmih ia ka doh ban bam ha jylla bad pynduna ïa ka jingshaniah na ka jingshalan nabar.
Ki jingïakren halor ki kam ïalehkai kiba la pynshong nongrim ha ka Sports Action Plan ba la sdang ha u snem 2025 ban pynroi ïa ki nongïalehkai, ryngkat bad ki 303 tylli ki projek kiba shongdor palat 2,000 klur tyngka kiba dang ïaid shakhmat ban pynlong ïa ka National Games 2027, kaba thmu ban thaw ïa ka lynti ban kyntiew ïa ka ïoh ka kot ha ka jingïalehkai kaba pynleit jingmut ha ki samla.
Hapoh ka PRIME Meghalaya, palat 500 ngut ki nongsengkam la ai ïa ki jinghikai, kaba la ïoh ïa ka jingkiew kaba 25% ha ka jingmih hadien ba kila pyndep ïa ki jinghikai. Ban pynkhlaiñ shuh shuh ïa ka rukom seng kam seng jam, ka prokram CM-ELEVATE ka buhthong ban ïoh palat 3,800 ngut ki nongïoh jingmyntoi da ka jingmang pisa kaba palat 130 klur tyngka. Ki plan ki kynthup ban pyndep ïa ka Startup Policy bad ban sdang ïa ka PRIME Venture Capital Fund ka ban kyrshan ïa ki nongseng kam lyngba ki jingbei tyngka jong ki riew shimet.
Ka kam jngohkai, Arts and Culture ka la buh ïa ka lynti kaba khlaiñ ban aikam aijam ia kumba 1.25 lak ha u snem 2028. La buh ïa ka thong ban pynroi 3,000 tylli ki ïingbasa hapoh u snem 2028 hapoh ka CM Meghalaya Homestay Mission 2025, kaba tyrwa subsidy ba 70%.
Ka jingïakren halor ka jingpynkylla ïa ki jaka sor ka la wanrah ïa ka buit treikam kaba bniah ban pynwan dur thymmai ïa ka jinglong ki jaka hapoh ki jaka sor ka Jylla, da kaba buh hakhmat eh ïa ka jingweng ïa ka jingkhapngiah jong ka nongbah Shillong lyngba ka jingpynbeit thymmai ïa ki lynti ïaid kali bad ka jingpynkynriah ïa ki nongdie madan ba la pynbeit ryntih, ka nuksa ban leh kumjuh ha sor Tura bad Jowai ban pynbeit ryntih ïa ki jaka sor.
Ha ka jingkren pynkut, u Myntri Rangbah ka jylla u la ban jur ba ka jingdon ïa ka jingïohi jngai ne jingmut kam pat biang satia, namar ka donkam ïa ka jingtreilang. U la pynshlur ïa ki ophisar ban don ïa ka jingngeit bad ban bteng ban trei ïa ki kam kiba lah ban leh.