Suba sniew ka RBYF, lah ban don ki briew ba nabar ba thmu pynjot ïaki khun samla ha u drok

Nongpoh, Naitung 09: Ka jingjyllei jong u drok bad ki khun samla kiba la kyrni ha kine ki sngi ba mynta ha kylleng ka jylla bad khamtam ha Ri-Bhoi District kaba la pynsuba sniew ïaka seng Ri-Bhoi Youth Federation (RBYF), hato ki don ki briew ba nabar ki buh thong ban pynjot bad pyntroiñ ïaki khun samla? Ne ka dei ka jingtlot jong ki? Bad shaei ka lawei jong ka jaitbynriew? buh jingkylli u President ba rangbah duh ka seng u Bah Bipul Thangkhiew.
U Bah Bipul Thangkhiew u la ong ruh ba ka jingjyllei jong u drok bad ki khun samla kiba la kyrni ha ki sngi ba mynta la ishyrkhei ban peit namar katei ka bih kala sdang ban rung shaduh ki shnong nongkyndong bad ki iing ki sem jong kiba lui lui bad kan long ka jingma ïaka imlang ka sahlang lada ki bor shnong, ki seng kynthei, ki khun samla kim don ka jingkitkhlieh ban ïatreilang bad ban rat diengkhong ïa utei u jait jingdih buaid.
Lah ruh ban ong ba ki kam tuh kam thiem kila jur bha ha kylleng ki jaka ka Ri-Bhoi, bala suba naka jingkynrei ki nongdih drok ha kaba kiba bun ki iing ki sem, ki dukan bad kumjuh ruh ki kali ki shah prong tuh naka por shaka por bad bun naki paidbah kila ud halor ka jingsdang kynrei ki nongtuh kiba ju prong ki kali bad shah tuh ki tape, ki speaker bad kiwei kiwei ki tiar.
Kane ka jingkynrei jong ki nongdih drok lah ruh ban ong ba kala jur bha ha ka thaiñ Byrnihat, Nongpoh, Umsning bad kiwei kiwei ki shnong bad sdang ruh ban rung wat sha ki shnong nongkyndong kaba la wanrah ka jingtieng jingsyier ïaka imlang ka sahlang khamtam ki kynthei khynnah bad kum ki paidbah khamtam ki bor shnong, ki khun samla ki dei ban husiar bad donkam ruh ka jingpeitngor haki shnong ki thaw naka jingjur ki nongdih drok kiba ju mlien ban leit tuh kat shaba lap ba tang ban ioh ïaki tiar ki tar ban die pat ïaki naka bynta ban ioh pisa bad kumjuh ruh naka tnad pulit ban shimkhia naka bynta ban rat diengkhong ïaki kam tuh kam thiem bad ki kam sniew khamtam ka jingkhaii drok namar katei ka bih kala buh jingma ïaki khun samla ha kane ka juk ba mynta.
U la ong ruh ba naka liang ka seng RBYF kan nym shong kli kti nangne shakhmat, ha kaba naka liang ki shipai jong ka seng kila long kiba khreh ban mih madan ban pynduhjait ïa utei u jait jingdih ba buh jingma ïaki khun samla bad ruh ka jingsyier haka imlang ka sahlang ha kaba naka liang ka seng kala pan ruh ka jingïatreilang naduh ki seng longkmie, ki bor shnong ban ïatrei ryngkat ryngkat naka bynta ban rat diengkhong ïa katei ka bih.