Nongstoiñ, L’lyngkot 18: Ka Ophis treikam jong ka District Legal Services Authority West Khasi Hills District, ka la pynlong ïa ka prokram pynshai paidbah halor ki lad jingïarap na ka bynta ki khunlung khynnah, ki aiñ shongkha khynnah bad halor ki aiñ kiba dei bad ka jingïarap ïa ki paidbah nongshong shnong kiba mad jingeh.
Ïa kane ka Prokram la pynlong ha ki ar tylli ki ïew kata hapoh ka Ïew Kynshi kaba hap hapoh ka Mawthadraishan C&RD Block bad hapoh ïew Langstieh Mairang C&RD Block.
Kane ka prokram ka long ruh kum shibynta ka jingpynphriang paidbah ïa ka portal 1098 bad 15100, ki ar tylli ki helpline ba kongsan ha ri India. Ka 1098 ka dei na ka bynta kan ki khynnah (Childline) bad ka 15100 na ka bynta ka NALSA Legal Aid Helpline, ryngkat bad ki jingshakri lyngba ki portal online jong ki.
Ka jingthmu ka long ban kyntiew ïa ka jingtip paidbah, khamtam na bynta kito ki ba donkam jingïada kum ïa ki khynnah bad kito kiba donkam jingïarap ruh ha ka liang ka aiñ, khnang ba kin lah ban ïoh bynta bad pyndonkam ïa ki lad jingïarap ha ka por ba donkam.
Ki riew shemphang na ka tnad DLSA kiba kynthup ïa ka kong L.Nongrem LAC kaba la ai jingkren ha ïew kynshi bad ka kong A Khardewsaw LAC kaba la ai ka jingpynshai ha ïew Mairang, halor ki aiñ jong ka shongkha khynnah ha ryngkat ka jingwan sngap da ki paidbah kiba wan ïew wan hat.
