Haduh 30,000 ton bam dohkha ka Meghalaya pynmih pat tang 20,000 ton shisnem

Shillong, K’Lyngkot 17: U Myntri Rangbah ka Jylla Conrad K Sangma u la ong ba ka Meghalaya ka iakhun tyngeh ban kyntiew stet ia ka kam ri dohkha ha ka jylla khnang ban pynduna ia ka jingduna dohkha ha ka jylla bad ban pyntikna ba ka Jylla kan dap dohkha tang na ka jylla lajong.
Kumba long mynta hi ka Jylla Meghalaya ka bam dohkha haduh kumba 28,000 – 30,000 ton ha ka shisnem katba ka jingpynmih dohkha pat ka long tang kumba 20,000 ton ha ka shisnem shisnem, ong u Myntri Rangbah.
“Ngi iakhun tyngeh ban kyntiew bad iarap ia ki nongri dohkha jongngi ba kin ri kham bun bad ban don khambun ki jingkyrshan bad ki skim na ka bynta jong ki,” bynrap shuh shuh u Myntri Rangbah Conrad Sangma.
Ha kajuh ka por u Myntri Rangbah u la ong ruh ba ka sorkar ka iakhun borbah ban pynshlur ia ki nongseng kam lajong ba kin seng ia ki kam ri dohkha kaba iar bad heh khnang ba kan long ruh kum kawei na ki lad kamai kaba kham heh.
“Ngi la kyrshan ia ki ba kin lah ban pynmih kham bun ka dohkha. Kiba bun na ki nongri dohkha jongngi ki dei kiba ri tang khyndiat kumta ban poi sha ka thong ngi donkam kumba 20, 30,ne 50 kynhun ki nongri dohkha kiban ri kham bun bad kham heh ka rukom ri dohkha ban bam ban pyndap ia ka Jylla,” u la bynrap biang.
Ha kajuh ka por u Myntri Rangbah u la iathuh ruh ba kum ka sorkar ki don ka jingkyrmen ba ka jingpynmih dohkha na la kajong ka jylla kan sa dap khlem da donkam shuh ban shaniah ne pynpoi na shabar jylla. Ha kajuh ka por u ong ruh ba da kaba leh kumta kin sa lah ruh ban aikam aijam bun bha wat ban shalan sha kiwei ki jylla ruh.
“Ngi tang shu lah ban pynmih 30,000 – 32,000 ton ka dohkha ban ha ka shisnem ngin sa lah wat ban shalan wat sha kiwei ki jylla kiba don marjan,” u la ong.
Shuh shuh u ong ba ka sorkar jylla ka la pyntikna ba ki dohkha ba ki paidbah ki bam ki long kiba shngain bad ba koit ba khiah namar ki hap ban iaid phah test bun jaka ha ka tnad Food Safety.
“Mardor ngi shimkam haba don kino kino ki jingjia ba don ka jingleh thok ne ka jingartatien ia ka rukom pynkhreh ia ki marbam,” u la bynrap biang.