Nongstoiñ, Naitung, 9: Ka surok ba la shna da ka tnad PWD na porla sha Tynhiang lyngba ka shnong Rimardon, ka dei kaba kaba donkam bha hynrei la bun bun snem naduh ba la shna ïa ka, ka sorkar kam shym pat la pynbha ne siang rong ïa katei ka surok. Kumta ka la buh ïa ki paidbah nongshong shnong ha ka jingeh kaba khraw.
Dei tad hadien ba u bah H.L.Nongsiang MLA barim u ba dei ruh u nongaibuit jong ka NPP Mawshynrut, u la ai jinghmut ïa u Bah Gigur Myrthong MLA ba mynta jong ka Mawshynrut ba un pynsngew sha ka sorkar, ba ki paidbah ka thaiñ Tynhiang ki donkam palat ban don ïa ka surok kaba bha. Kumta utei u Nongmihkhmat u la pynsngew sha ka sorkar bad u la lah ruh ban pynkohnguh ba kan mang pisa na ka bynta ban pynbha bad siang rong ïa katei ka surok.
U bah B.Lyngkhoi Secretary ka shnong Tynhiang haba ïakren bad u nongthoh khubor mynta ka sngi, u la ong ba ka surok ka dei u budlum na ka bynta ban kyntiew ïa ka ïoh ka kot bad ban pynsuk ïa ki paitbah ha ka leit ka wan, ka kit ka bah bad ka kamai kajih. Kumta ka jingmang pisa jong ka sorkar ban pynbha bad siang rong ïa katei ka surok ka la long ka jingkyrkhu kaba khraw ïa ki paidbah.
U bah Lyngkhoi u la ong ruh ba ka jingpyntrei ïa katei ka surok ka la ïaid shait shait naduh u snem ba la dep bad ka la pynsuk shibun ïa ki paitbah ha ka leit ka wan. U la ong ba na ka liang ki paitbah nongshong shnong jong ka Rimardon,Tynhiang, Proiñ bad kiwei kiwei ki shnong kiba don ha katei ka thaiñ, kim lah khlem da ai khublei ïa u bah G.Myrthong MLA ba mynta bad ïa u bah H.L.Nongsiang MLA barim ba ki la shimkhia na ka bynta ka jingdonkam jong ki paitbah.
