Bakla ka lad pathai khubor, ym shym pynbna ïa ka P.A.Sangma Stadium kum ka bym shngaiñ

Shillong, Kyllalyngkot 17 : U Myntri Rangbah ka Jylla Conrad K Sangma ula pynpaw ba ki khubor ba mih ha kawei na ki lad pathai khubor ba ong ba ka PA Sangma Statium ka dei kaba la pynbna bym shngaiñ da ka District Disaster Management Authority (DDMA), ka dei ka khubor ka bym shisha bad kaba ïalam bakla.
“Ka jingshisha jong ka kam hi ka long kaba suk bha. Ka DDMA kala thoh sha ka Coal India ba ong ba sngewbha ai ïa ka jaka ban ïoh pynïar ïa ka west stand (jaka shong sha sepngi) namar kane ka jingtei baroh kan ym long kaba shngaiñ lada ngim ïoh jaka na ka Coal India khamtam haba kane ka west stand ka dei kaba donkam ban shna noh mardor” ong u Conrad haba ïakren bad ki nongthoh khubor ha ka sngi Saitjain.
Ula batai baka kynroh jong ka west stand kala khyllem dang shen bad ka Sorkar Jylla kala mang ïa ka pisa ba 45 klur tyngka ban tei biang ïa ka.
Ka shithi ka DDMA sha ka Coal India ka long ban kyrpad ha ka ban ai jaka ban ïoh pyniar ïa ka west stand bad ban shna ïa ka surok sha ka shnong ba marjan.
U Conrad ula kyntu ïa kane ka khot khubor ba kan da wad bniah bha hashuwa ban pynmih ïa kano kano ka khubor.
“Nga kyntu ïa ki lad pathai khubor ba ha jaka ban shu shongshit ba ïoh khubor bad pynmih ïa ka khubor khlem da wad bniah bha, kane kan wanrah tang ïa ka jingsngew artatien ban shaniah ha kane ka kot khubor” ula ong.