SHILLONG, Kyllalyngkot 17: Ka Shillong Sixers bad ka Mawsyiem CC ki la long ki ar tylli ki kynhun ba khatduh ban pynthikna ïa ka jaka jong ki ha ka semi final jong ka lympung Shillong Cricket League 3rd Division 2026 ba la pynïaid da ka Shillong Cricket Association.
Kane ka la wan hadien ba ki la jop ïa la ki jong ki jingïalehkai Quarter final kiba la long hynne ka sngi Saitjaiñ, ha kaba ka Shillong Sixers ka la pynliem noh da 10 ron ïa ka Turshaprang CC, nangta ka Mawsyiem CC ka la jop da 2 wiket pyrshah ïa ka Shibakha CC.
Ha ka Quarter final ba nyngkong, hadien ba jop ïa ka jingkynting pisa (toss) ka Shillong Sixers ka la kam trai ban tied nyngkong, bad ki nongtied ki la lah ban tied pyndep ïa ki 20 ober ban kamai 183 ron na ka bynta 7 wiket kiba la hap noh.
Kiba la lamkhmat ha ka tied na ka bynta ka Shillong Sixers ki long u Sandeep Roy (kamai 38 ron naki 24 bol) bad u Meinam Amit Singh (kamai 33 ron naki 26 bol). U Rudolf (khur 3/38 naki 4 ober) bad u Ruddystar Shangpliang (2/34 naki 4 ober) kidei kiba seisoh tam ha ka boling na ka bynta ka Turshaprang.
Hynrei haba pyrshang beh ïa ka thong, ka Turshaprang ka la lah ban kamai duna ïa kaei kaba ka donkam, kata da tang 173 ron, bad hap 9 wiket, watla ka la tied pyndep ïa ki 20 ober ba la mang. Na ka liang jong u Raimon u la lehkai bha da kaba kamai 66 ron naki 36 bol, hynrei ka jingbym don kiba kyrshan lem ïa u ka la pynlong ïa ka kynhun ban mad ïa ka nam rem.
Napdeng ki nongkawang bol jong ka Shillong Sixers, kiba la tyngshaiñ ha ka boling ki long u Probeson Bey (khur 3/22 naki 4 ober) bad u Sandeep Roy (khur 2/34 naki 4 ober), uba la khur syndon ïa ka khusnam Player of the Match.
Ha ka Quarter final kaba bud, ka Mawsyiem ka la buh ïa ka thong kaba 173 ron haki 20 ober, da kaba khyllem 9 wiket. U Philemon Shylla (kamai 62 ron naki 30 bol) bad u Jied (30 ron naki 18 bol) ki long ki nongtied kiba la noh synñiang bun ron ïa ka kynhun.
Napdeng ki nongkawang bol jong ka Mawsyiem, u Pynsuk Nongsiej (naki 3 ober ailad 20 ron) bad u Malcolm Syiemlieh (naki 2 ober ailad 21 ron) ki la ïoh ban khur mar 2 wiket, nangta ka kynhun ki nongtied ki la pyndep ïa ka kamram da kaba kamai 177 ron ha ka jingduh noh 8 wiket haki 19.5 ober ban khur ïa ka jingjop.
Ka jingïaroh ka long sha u Devention Lyngdoh uba la duna tang 9 ron ban kynjoh sha ka spah ron, hadien ba u la lah ban kamai 91 ron tang naki 47 tylli ki bol, kaba la pynlong ïa u ban khur ïa ka khusnam Player of the Match, uwei pat u nongtied uba kham seisoh udei u Pynsuk Nongsiej (24 ron naki 13 bol).
Kumta ki saw tylli ki kynhun ki ban ïakhun ha ka semi final ha kane ka Shillong Cricket League 3rd Division 2026 ba la pynïaid da ka Shillong Cricket Association ki long ka Youngstar, AGES, Shillong Sixers bad ka Mawsyiem CC.
