Kloi ka sorkar ban shongbishar ïa ki kam nonghikai ba ngat ha ka jingshah kynnoh dak thohbria: Conrad

Shillong, K’ Lyngkot 16: Ka Sorkar Jylla ka la pynpaw ïa ka jinglong ba la kloi ban shong bishar ïa ki kam jong ki nonghikai ba ngat ‘dak thohbria’ ha ka thungkam Assistant Teacher ki skul Lower Primary u snem 2008, ong u Myntri Rangbah Conrad K Sangma ha ka sngi Thohdieng hadien ka jingïalang ka kynhun Myntri.
Haba ïadei bad kane haba kren bad ki nongthoh khubor, u Conrad ula ong ba ka Sorkar ka la pan ïa ka rai na ka Ïingkashari Supreme Court lane High Court ban shong bishar biang ïa kane ka case kaba la slem. U la ong, “Ngi la pan na ka Supreme Court lane High Court ba kin ai ha ngi ïa ka rai lane ka jingbit la ngi lah ne em ban bishar biang ïa kane ka kam bad ngin da kmen shibun ban bishar thymmai ïa ka. Lada don ki case kiba dei hok bad lada don ki briew kiba shah ktah namar ka jingbym dei, khlem pep ngi kwah ban shong bishar ïa kata.” U Myntri Rangbah ula kren ïa kane haba jubab ïa ka jingkylli halor ka jinglong jingman ki nonghikai ba shah pynngat dak thohbria hadien ka hukum ka Ïingkashari Meghalaya High Court ba 4 tarik Nailur 2025, kaba pynïap noh ïa ki jingkynnoh pyrshah ïa ka Myntri barim ka tnad Pule Puthi Kong Ampareen Lyngdoh, u Director barim ka Elementary and Mass Education JD Sangma bad Deputy Director barim Ameka I Lyngdoh.
U Conrad ula kular ba ka Sorkar ka la ïakren bad kine ki nonghikai bad ka la pynkhreh ïa ki lad ki lynti ban jam shakhmat halor kane ka bynta.
U la ong, “Nga la bthah ïa u Chief Secretary ban shong bishar ïa ki lad ki lynti bad u dang leh mynta ïa kane ka kam bad ban khmih kumno ngin pynïaid shakhmat ïa ka kam.”
Nalor kane, u Conrad ula pyntip ba ki don kumba 140 ngut ki nonghikai kiba la dep ban thungkam ha ki por ba la leit.
U la bynrap, “Lada phi kynmaw, man ka por ba ka Supreme Court lane High Court ki ai ka lad ïa ngi ban shong bishar, ngi la shong bishar. Kumba 140 ngut ki nonghikai lah thungkam biang ha ka sien bishar ba nyngkong hadien ba ngi shem ba kim shym la donkti ha kane ka kam.”