Shillong Kyllalyngkot 16: Mynta ka sngi Thohdieng ki pulit ki la ïoh ban kem ïa u runar uba donkti ban thombor da kaba bom da u nar rod na khlieh bad lute ïa kawei ka longkmie ba 42 snem, kaba sah ha Upper Lachumiere, Shillong.
Une u runar u kyrteng u Navin Sunar ba 43 snem, ong u Superintendent of Police ka East Khasi Hills Bah Vivek Syiem haba pyntip ba ïa une u runar la ïoh kem da ki Pulit ka Pastuer Beat House na Boucher Road.
Kat kum ka jingong jong u, la pyntip ba ha ka 14 tarik u Kyllalyngkot, ki pulit kila ïoh pdiang ïa ka ejahar ba uwei u briew u bym lah ban ithuh ula leit rung jubor ha ka ïingsah jong ka Devi Basumatary, kaba shong basah ha Upper Lachumiere, Shillong ha ka por kumba 2 baje mynsngi jong ka 13 tarik Kyllalyngkot.
U SP u ong, haba ka Devi kala ïohi ïa une u briew hapoh ka kamra ka jongka, kala pyrshang ban khang kut ïa u hapoh kamra, hynrei une u briew ula bom da u nar rod na khlieh bad ka byrngem ban shim ia ka jingim.
Hadien kane ula rah ïa ka bek kaba don ïa ka mobile phone bad ka pisa bad phet krad syndon na katei ka ïing.
Ka Devi Basumatry kala mynsaw ha katei ka jingjia bad la pynkit noh ïa ka sha hospital ban ïoh ïa ka jingsumar.
ïa u Navin Sunar la pynngat case hapoh ka Laitumkhrah Police Station hapoh ka kyndon 331(7)/304(2)/351(3)/127(2) BNS 2023.
