Shillong, Kyllalyngkot 16 : U Myntri Rangbah ka Jylla Conrad K Sangma ula ïathuh ba ula ïakren bad ka Sorkar Pdeng bad ki bor pynïaid ka North Eastern Hill University (NEHU) ban pynbeit noh ïa ka kynrum kynram kaba don mynta ha kane ka skulbah.
“Hooid, ka long kaba sngewsih bad kaei kaba jia ha NEHU kala ktah shisha ïa ki samla pule bad ki briew kiba trei hangtei. Kaei kaba paw la i kumba kiei kiei kila shu sahkut hajuh ïa mynta” ong u Conrad haba ïakren bad ki nongthoh khubor.
“Nga la ïakren ha ki kyrdan bapher bapher ha ka Ministry bad kumjuh ruh bad u Myntri hi bad wat sha NEHU. Kumba phi tip, ka NEHU ka dei ka skulbah kaba hap hapoh ka jingkhmih ka Sorkar Pdeng, kumta ka long ka kam kaba eh ïa ngi ban tuklar beit beit ïa ka, ngi lah ban shu shim ïa ka bynta ban ïakren hapdeng ki arliang mamla, bad kane ka dei kaba ngi leh mynta” ula ong.
U Conrad ula kular ba ka Sorkar Jylla ka lah pyrshang kat kaba lah ban wad ïa ki lad ki lynti ban pynbeit ïa kane ka kam bad u Myntri ka Tnad Pule Puthi ula ïakren bad ki Ophisar ka NEHU.
“Ngi la pyrshang kat kaba lah. Katba ngi dang ïakren, nga tharai u Myntri ka tnad Pule Puthi ula ïakren ïa ki katto katne ki Ophisar na NEHU ban wad ïa ki lad ki lynti ban pynkut noh ïa kane ka kynrum kynram ba don hangtei” ula ong.
