Pynlut ka sorkar T.23 496 klur haduh u Nohprah ka jingpynlut kaba hehduh ha ka mang tyngka

Shillong, K’ Lyngkot 16: U Myntri Rangbah ka Jylla Conrad K Sangma ula kheiñ thamula ïa ki jingkynnoh ba don ka jingpynïaid bakla ïa ka pisa tyngka, haba pyntip ba ka Sorkar Jylla ka la pynlut haduh T.23,496 klur haduh u Nohprah, kaba dei ka jingpynlut ba hehduh ha une u snem mang tyngka.
U Myntri Rangbah u la ong, “Ka jingpynlut jong ngi baroh lang naduh u 2017 ka kot T.10,000 klur, kane ka dei ka jingpynlut ba shisha, ym ka mang tyngka. Mynta u snem, tad haduh u Nohprah, ngi la pynlut haduh T.23,496 klur. Tang ha u Nohprah marwei, ngi la pynlut jan kot T.2000 klur, kaba kynthup ïa arbnai ka tulop ki nongtrei bad ki bill jong ki tnad bapher bapher.”
Ïa kane u Conrad u la ong haba jubab ïa ka jingkynnoh ba dang shen da u Nongïalam ka Liang Pyrshah u Dr Mukul Sangma.
U Myntri Rangbah ula ainam ïa kane ka jinglah pyndonkam bha ïa ka pisa sha ka jingpynkylla ha ka rukom treikam bad ka jingpyndonkam ïa ki technology.
U la ong, “Ngi la leh shibun ki jingpynkylla ha ka rukom treikam, ka jingpyndonkam ïa ki technology, bad shibun ki kam lah ha kata ka rukom ba kan ym pynkhia kam than ïa ngi ha ka 20 tarik u Nohprah lane ha ka 28 tarik u Lber.”
U Myntri Rangbah u la ai nuksa ïa ka online system kaba pynlah ïa ki Ophisar ban pynkhuid ïa ki jingtyrwa bad siew ïa ki pisa ba dei ban siew da kaba bynrap, “Wat lada ki ophis ki don sha kawei pat ka jaka kyndong jong ka pyrthei, um donkam ban hap da wan hi dalade na ka bynta ban ai jingmynjur ïa ki jingtyrwa. Ki lah ban shu leh online nangno nangno ruh.”
U la ong ba ka Sorkar ka la treikam da ka jingstad ban lah pyndap ïa ki jingpynlut bad ka da leh ha ka rukom kaba dei. “Ngi la pynlut da ka jingstad bad ka jingpynlut ba heh duh ha ka histori ka Jylla ka la jia ha une u snem mang tyngka ba mynta. Ngi la kot jan T.24,000 klur, tad haduh u Nohprah,” u la bynrap.
U Myntri Rangbah ula kyntait ruh ïa ki jingkam ba ki rai jong ka Sorkar ban khang ïa ka Ophis naduh ka 19 tarik Nohprah ka dei namar ka jingbym don pisa.
U la ong, “Kam don jingïadei satia ka jingkhang ophis naduh ka 19 tarik Nohprah bad ka jingbym don pisa. Ka pisa ka dei beit ka jingeh, hynrei ngi lah trei ïa ki kam ban pynthikna ba ngin lah pyndap ïa ki jingpynlut jong ngi ha ka rukom kaba biang kat kaba lah.”