SHILLONG, K’Lyngkot 16: Ki Pulit jong ka West Garo Hills District kila kem biang sa ïa ar ngut ki briew kiba donkti ha ka jingshah pynïap u dkhot jong ka ACHIK u Dilseng Sangma ha Rajabala.
Ïa kine la kem hynnin ka miet la ïathuh u Superitendent of Police (SP) ka West Garo Hills u Abraham T Sangma ha ka janmiet sngi Thohdieng.
Kine ki ar ngut kiba la shah kem la tip kyrteng kum u Bahadur Shiekh (21) bad u Mozidur Hussain (22)
Da ka jingkem ïa kine ki ar ngut, baroh kiba la shah kem mynta ki la kiew sha ka hynriew ngut.
Kum ban shu kdew u Dilseng u dei u dkhot jong ka ACHIK uba la shah thombor ha ka 9 tarik myntau bnai da ki briew kiba shah kynnoh ba ki kyrshan ïa ka jingtih maw beain.
Ki briew kiba la kem ïa kaba la suba ba ki dei kiba donkti ha ka 9 tarik mynta u bnai ki kynthup ïa u Rafiqul Islam (47), u Anarul Islam (30), u Atowar Islam (40) bad sa u wei pat uba la suba la tip kyrteng kum u Ariful Islam (30) uba la shah kem ha ka 11 tarik.
