Shillong, K’ Lyngkot 16: Hadien ka jinglap ba ka don kawei ka agency kaba pynïaid ïa ka kam security guard ha NIT Sohra, kaba la pyndonkam bakla ïa ka NOC jong ka KHADC, ha ka 16 Tarik u kyllalyngkot, ka seng Hynñiewtrep Nationnal Youth Front (HNYF) South East Sohra Circle, ka la ïoh ban ïakynduh ïa u Registrar officer jong ka NIT ban dawa ba dei ban cancel noh ïa ka license ka North East security service, namar ki kam shukor bad ban beh noh ia ka na katei ka jaka pule.
Hadien ka jingïakynduh ïa u Registrar, u nongaiktien ka Seng u Bah Banjoplang Khongwir u la ong ba ka NIT kan sa peit bniah bad lada ka NESS kam don shisha ïa ki kot ki sla, na ka liang ka NIT kan cancel noh ïa ka NOC jong ka.
Halor kane ka seng ka la dawa ruh na ka NIT ba kam dei ban pynduh ïa ka bai nong ne bai bylla ki nongtrei security guards, kiba don don ha katei ka institute, kaba ki lah dep ban trei, lada ki lah cancel ïa ka NOC jong ka katei ka Agency.
