Ka Cabinet Secretariat ka dei ka jingkynshew ym ka jingpynsyrwa kai ïa ka pisa: Conrad

Shillong, K’ Lyngkot 16: U Myntri Rangbah ka jylla Conrad K Sangma ula pynksan ïa ka jingpynlong ïa ki Cabinet Retreat kaba dei ka jingïalang ka kynhun Myntri shabar ka Secretariat da kaba ong ba kane ka dei ka jingkynshew (investment) ym ka jingpynsyrwa kai ïa ka pisa, hapdeng ki jingkynnoh na ki Liang Pyrshah ha kine ki sngi.
U la ong, “Baroh kiei kiei ki dei ki jingpynlut, hynrei lada phi kylli ïa nga, kane ka dei ka jingkynshew. Namar kata, phi lah ban peit ïa ka na kawei pat ka jingïohi jong phi. Nga la ïohi ba ki jingkynnoh pyrshah ki don beit, bad nga sngew ba ka long kongsan ïa ngi ban ïohi ïa ka thong kaba kham heh.”
Ia kane u Conrad u la jubab ha ka jingïakren bad ki nongthoh khubor ha shuwa ban sdang ka Cabinet Retreat kaba lai, kaba la ïaid shakhmat ha ka sngi Thohdieng ha Orchid Resort, Mawkasiang, New Shillong Township bad kan kut ha ka sngi Saitjaiñ.
Halor kane u Conrad ula pynpaw ïa ki jingmih jong ka Cabinet Retreat ba nyngkong haba ai nuksa ïa ka jingai jingbatai ba bniah jong ka Tnad Pule Puthi halor ki nonghikai Adhoc bad SSA.
U la bynrap da kaba ong, “Ha ka cabinet retreat ba nyngkong, ka tnad Pule Puthi ka la ai sha ngi ïa ka jingbatai kaba jrong bha, ngi la ïashong bad khmih ïa ki nombar, bad man ki Myntri Sorkar, man ki Ophisar kila ïa khmih ïa kane, bad ngi la shim ïa ka rai ban pynbeit ïa kane ka jingeh ha u 2025.”
U Myntri Rangbah u la ïathuh ba ki Retreat ki la lam sha ka jingpynbeit ïa ka kam jong ki nonghikai Adhoc bad SSA, bad ong, “Ngi kmen bha ban pyntip sha phi ba ngi la lah ban shim rai. Lada jin ba ka cabinet retreat kam long, lehse ngi lah ban nym pat lah pynbeit ïa kane ka kam”.
Shuh shuh u Conrad ula ban jur ïa ka jingkongsan kum kine ki Retreat bad bynrap, “Nga ieh ha phi ban rai la kine ki jait kam ki long kongsan ne em.” U la kyrpad ïa ki nongkynthoh pyrshah ba kin khmih ïa kaei kaei kaba kham heh bad ki jingmih na kane ka retreat, ha ka jaka ban shu kynnoh ba dei ka jingpynsyrwa kai ïa ka pisa ki paidbah.
U Conrad u la ong ba ka cabinet cetreat kaba lai ka la sdang artad, da ka jingthmu ban pynïaid lang hajuh ïa ka jingïohi jngai bad ka thong jong ki Tnad bapher bapher khnang ban lah kynjoh ïa ka jingthmu kaba heh jong ka Jylla.
U la bynrap, “Man ki cabinet retreat ki don la ki jong ki jong ki phang hynrei ka jingthmu ba kyllum lang ka long ban pynïahap lang bad ka jingïohi jngai kaba kham heh jong ka Sorkar Jylla bad ban sngewthuh ïa kaei kaba ki Tnad bapher bapher ka Sorkar ki leh.”
Na ka liang u Conrad ula batai ba ka retreat ka dei ka kabu ïa ki Ophisar bad ki Minister ba kin sngewthuh ïa ki prokram kam pynroi bad ki kam bapher bapher ba leh da ki tnat bapher bapher ka Sorkar.
La ong ba ka retreat ka pynleit jingmut halor ki 10 tylli ki jingkut jingmut bad ki 10 tylli ki lad ki kabu bala buh ha ka State Vission 2008 bad Vission 2032.
U la ong, “Ngi dang pyrshang ban batai ïa ki paidbah ba katba ngi dang kynjoh bad katba ngi dang pyrshang ban kynjoh ïa ka 10 million dollar economy bad 16 million dollar ha u 2032, kumno ka kam jngohkai ka shim ïa ka bynta, kumno ka tnad PWD ka shim ïa ka bynta.”
Na ka liang u Myntri Rangbah ula ban jur ïa ka jingkongsan ban don ka jingïatreilang bad ka jingïakren markhmat hapdeng ki Tnad bapher bapher. “Ki Ophisar ki long laitluid ban kylli ïa kano kano ka jingkylli bad long laitluid ban ai ïa kano kano ka jingmut. Ka long kum ka lad ha kaba ki Ophisar ki lah ban ai jingmut namar ki don ki khep ba ki jingai jingmut kiba biang eh ki wan na ki briew ba hapoh.”