Mynjur ka Kynhun Myntri ban pynrung ia ka subjek Community Integrated Skill Learning ha ki skul

Shillong, Kyllalyngkot 16 : Ka Sorkar Jylla kala ai jingmynjur ban pynrung ïa ka subjek Community Integrated Skill Learning kum ka curriculum ba la pynbeit ryntih na ka bynta ki klas VI haduh X.
Haba pynbna ïa kane ha ka sngi Thohdieng, u Myntri Rangbah u Conrad K Sangma ula ong “Ka Kynhun Myntri kala ai ka jingmynjur ïa ka jingtyrwa ban pynrung ïa ka Community Integrated Skill Learning kum ka curriculum bala pynbeit ryntih na ka bynta ki klas VI haduh X”.
Kane ka subjek ka thmu ban pynrung lang ïa ka sap ka phong ki khynnah ha ka Physical and Health Education Curriculum, ha kaba 50% ka marks yn ai sha ki khynnah skul kiba shim ia kano kano ki sap na ki bahaïing hasem ne ki shnong ki thaw.
“Ngi thmu ban buh 50% ka mark ïa ki khynnah skul kiba ïashim bynta ha kata ka sobjek,ha kaba yn bthah ïa ki khynnah skul ban hikai lang ïa kawei ka sap ne bun ki sap kaba ki kwah ban leh” batai u Conrad.
Kane ka sap ka lah ban don jingïadei bad ka kam khaïi pateng ne ka trei ka ktah ki bahaïing hasem, kum ka jingshet jingbam, ka rep jingrep, lane ka kam shoh nar, ka ban ailad ïa ki khynnah skul ba kin shim ïa ki jinghikai na ki kmie kpa ne ki bahaïing hasem.
Kane ka jingpynkhreh kan don bun ki jingmyntoi, kynthup ka jingpynlah ïa ki khynnah skul ban don ïa ka sap ka ban don jingmih, pynshlur ban pynbteng ïa ki kam ba trei ba ktah ki bahaïing hasem bad kiwei kiwei.
U Myntri Rangbah ula ban jur ba kane ka sienjam kan pynshlur ïa ki khynnah skul ba kin ïakren ïakhana bad ki kmie kpa bad ban shim ïa ki jinghikai ha ki sap kiba kynsai, haba ïoh marks ruh ha ki jingpule jong ki.