Plie ka Ophis u Principal Accountant General (A&E), ïa ka Online Pension Application Module

Shillong, K’ Lyngkot 15: Ka ophis jong u Principal Accountant General (A&E), Meghalaya, Shillong, mynta ka sngi ka la plie ïa ka Online Pension Application Module, ka jingai jingshakri digital ba thymmai kaba ïasoh lang bad ka rynsan e-Pension kaba la don lypa.
Ïa ka module la plie paidbah da u L. Hangsing, Principal Accountant General (A&E), Meghalaya, ha ka jingïadonlang u Swapnil Tembe, Secretary (Finance-Pension), Sorkar Meghalaya; B. L. Nonglait, Director of Accounts & Treasuries, Sorkar Meghalaya; Benos Lyngskor, Scientist (F), NIC, Shillong, bad kiwei kiwei ki kynrem ki lyndan.
Ha ka jingai jingkren, u L. Hangsing u la ong ba ka jingplie ïa ka Online Pension Application Module ka long kum u mawmer ha ka jingïaid lynti ka ophis ha ka jingkylla sha ki kam digital ba pura ha ka kam bai bam tymmen. U la ong ba kane ka sienjam kan pynkhlaiñ shuh shuh ïa ka jingshai ha ka jingpynpoi ïa ki jingshakri, ka jingpynduna ïa ka jingpyndonkam ïa ki kot ki sla, ka jingpynduna ïa ki jingpynslem ha ka jingtreikam, bad ka jingpynbiang ïa ka jingsuk ïa kito kiba pan ban ïoh bai bam tymmen.
U Swapnil Tembe u la ïaroh ïa kane ka sienjam bad u la kular ba ka Sorkar Meghalaya kan ai lut ki jingkyrshan khnang ban lah ban pyntreikam bha ïa kane ka sienjam.
Ka Online Pension Application Module ka plie lad ïa ki nongtrei Sorkar Jylla, ki ophisar All India Service (AIS), bad kiba haïing jong ki nongtrei kiba la khlad noh ba kin phah ïa ki jingpan bai tymmen ha kano kano ka por na kano kano ka jaka lyngba ka rynsan digital kaba suk ban pyndonkam bad kaba shngaiñ.
Ki bynta ba kongsan jong ka module ki kynthup ïa ka jingphah online ïa ki phom ban ïoh bai bam tymmen, ka jingphah ïa ki kot ki sla lyngba ki lad digital, ka jingbuddien ïa ka kam bad ka jingstet ban pyndep ïa ki kam kiba ïadei bad ka bai bam tymmen.