Nongstoiñ, K’lyngkot 15: Ka Nongstoiñ civil hospital kaba don ha Makadiang (Mawïawban) ka dei ka jaka sumar kaba heh tam ha West Khasi Hills kaba don harud ka surok bah ban hiar sha Riangdo. Na ka surok ban rung shaduh katei ka jaka sumar kam pat da sniew hynrei ka jaka ban mih pat ka la jot la pra lut. Halor ka jingjot jingpra jong katei ka surok na ka liang ki paidbah haba pyntip ki la ong ba la ka long kaba ilehraiñ ban peit ba ïa surok, namar ym tang ki nongpang kiba pyndonkam ïa katei ka surok hynrei baroh ki doctor, ki nurse bad ki nongtrei ha katei ka hospital ki pyndonkam man la ka sngi namar na shawei ym don jaka ban mih.
Ki la kyntu ruh ïa ka sorkar ba la kumno kumno ka la dei ban phah moramot noh kloi ïa katei ka surok khnang ba kiba pang ba shitom kiba phah sumar ha katei ka hospital kin kham suk.
