Ka jingkhang ban ïakren ïasuk bad ka HNLC i kumba ka la kham jwat, da peit ka jingkren u CM

Shillong, K’ Lyngkot 15: Ka jingkhang na ka bynta ka jingïakren ïasuk hapdeng ki ar sorkar bad ka Hynniewtrep National Liberation Council (HNLC) i kumba kala kham jwat lada pynshong nongrim katkum ka jingkren u Myntri Rangbah ka jylla u Conrad K Sangma.
Haba ïa kren bad ki lad pathai khubor, u Myntri Rangbah u Conrad K Sangma u la ong ïa kane ka mat hap ban eksamin bha halor ka jingïa kren ïasuk bad kaba donkam ban bishar bniah da kaba ïatreilang bad baroh ki nongïa don bynta lang, kynthup ïa ka Sorkar India.
“Kine ki dei ki kam kiba sngewkhia bha bad kiba donkam ïa ki jingpynkhreh kiba bniah.Ngi hap ban ïamir jingmut ba bniah bad baroh kiba donkti,” u la bynrap.
U Sangma u la pynskhem ïa ka jingangnud jong ka sorkar ban wanrah ïa ka jingsuk ha ka jylla Meghalaya. “Ka jingsuk ka long kaba kongsan, bad kum u Myntri Rangbah ka Jylla, nga long uba kloi ban shim ïa kino kino ki sienjam kiba donkam.Hynrei kane ka donkam ïa ka jingshimkhia, ka jingïatreilang, bad ka jingshimkhia lang na baroh ki liang,” u la ong.
Haba u pdiang ïa ki jingpyrshang ba la dep ban ïatreilang bad kane ka kynhun, u Sangma u la kdew ba ka shong ha ka jingïadei hapdeng ki nongdon bynta. “Lada ailad, bad lada baroh ki liang kin iatreilang, ngin bishar bniah ïa ka ban ïaid shakhmat.Hynrei haduh mynta ym pat lah ban shim ïa kano kano ka rai”, u la pynshai.
U Myntri Rangbah ka Jylla u la kren ruh shaphang ki jingkynthoh shaphang ka jingmap, da kaba ong ba kum kine ki jingtyrwa ki dang don ha ka jingbishar bad ym pat lah ban poi shano shano ruh.
Halor ka jingshah byrngem pynïap ïa u heh ka VPP u Bah Ardent Miller Basaiawmoit, u Conrad K. Sangma ha ka sngi Thohdieng u la pynpaw ba ka sorkar Meghalaya ka shim khia bha ïa ki jingbyrngem pynïap ba la pynmih da ki kynhun lehnoh ba la khang pyrshah, khlem da kheiñ ïa ka kyrdan jong ki riew shimet ne ki ba la shah jied da u paidbah.
“Ka sorkar kam ju pyniapher hapdeng ki nongmihkhmat ba la jied, ki nongkhaii, ne ki riew shimet kibalong tang kum ki nongshong shnong.Man la ka jingim ka long kaba kongsan, bad ka jingbyrngem ïa uno uno kin ym lah ban pdiang,” la ong u Sangma, da kaba pynksan ba ka jylla ka trei shitom ban pynthikna ïa ka jingshngain bad jingbit jingbiang jong baroh ki nongshong shnong.