Nongpoh, K’Lyngkot 15: U BDO ka Umling C&RD Block u la pynmih da ka hukum sha baroh ki Rangbah Shnong halor ka jingthang dusmon ïa ki khlaw ki btap haka kyrteng jong ka rep ka riang, namar kane ka jingpynthang dusmon ïaki khlaw ki btap ka wanrah ïa ka jingjot bad ka jingduhnong kaba khraw naduh ka jingduh jait ki sim ki doh bad ki mrad khlaw bad ktah ruh ïa ka jingtyrkhong ka mariang bad ka jingrngad noh ki um ki wah.
Kumta na ka liang u BDO u la bthah ïa ki Rangbah Shnong ba kin pynthikna ha la ki jong ki shnong ba kan nym don kano kano ka jingthang khlaw na ka bynta ban pynneh pynsah bad ïada ïa ka mariang bad ki tyllong um baroh, namar kum ki paidbah kim dei ban pyrkhat tang ïaka mynta hynrei ïa ka pateng ban wan.
