Mynta u bnai yn siew noh ka sorkar ïa ka tulop ki 288 ngut ki Nurse ba trei Kontrak

Shillong, Kyllalyngkot 14 : U Myntri ka tnad jongka koit ka khiah u Ma Wailadmiki Shylla u la pynthikna bad kular ba ka sorkar kan pyllait bad siew dep noh ïa ka tulop jong ki 288 ngut ki Nurse ba trei Kontrak mynta hi u bnai.
“ Kam dei satia ba ngi ap ïa kita ki Seng Bhalang ne ki Seng Saiñpyrthei ba kin dawa, ngi la dep ban pynïaid lypa shakhmat ïa ka kam ban siew dep ïa ka tulop ba dang sahteng jong ki Nurse” ïathuh u Ma Wailad.
U la ïathuh ka jingslem ka dei namar ba don ki jingduna hangne hangtai kiba hap ban pynbeit bad ka tnad Personnel namar ha kaba nyngkong ka la pynskhem ban pynjlan ïa ka kontrak tang jong ki 200 ngut ki Nurse ym jong baroh 288 ngut.
“ Kumta ngi la hap ban pynphai biang ïa ka file ban pynbeit ïa kane ka jingbakla namar ngi kwah ba baroh 288 ngut ki dei ban dang ïoh treikam kum ki Nurse hapoh ka tnad ka koit ka khiah” ong u ma Wailad.
Ka Kontrak jong kine ki Nurse ka la kut ha ka 1 tarik Naiwieng 2025 bad ka tnad ka koit ka khiah ka la pynïaid shakhmat ïa ka kam ban pynjlan biang ïa ka kontrak jong ki bad hadien kata ban pyllait noh ïa ka tulop jongki mynta u bnai. “Nga pynthikna mynta hi u bnai kin ïoh noh ïa ka tulop jongki “ pynkut u ma Wailad.