Yn phah tohkit bniah u CEM ha ki Enforcement halor ka NESSPL kaba ïoh tender ha NIT, Sohra

Shillong, K’Lyngkot 14: U Chief Executive Member (CEM) ka Khasi Hills Autonomous District Council (KHADC) u Bah Winston Tony Lyngdoh u la pyntip sha ki dkhot jong ka Hynñiewtrep National Youth Front, (HNYF) South East, Sohra Circle ba un sap hah ïa ki Enforcement ban phah tohkit bniah halor North Eastern Security Service Private Limited (NESSPL) kaba la ïoh ïa ka Tender ban pynïaid ïa ka kam pahara ha National Institute of Technology (NIT) Sohra.
Kane ka jingkren jong u CEM ka KHADC kala wan hadien ba ki dkhot ka HNYF South East, Sohra Circle kila leit ban kynduh ïa u halor ka jingai trading licence jong ka KHADC sha ka NESSPL.
Ha kane ka jingleit ban kynduh ha ka sngi ba-ar, ki dkhot jong ka HNYF kila ong ba kane ka agency ka la pyndonkam da kajuh ka Trading License kaba ba la ai ban thep tender ha DGAR, Laitkor.
U nongaiktien jong ka HNYF u Bah Banjop Khongwir u la ïathuh ba u CEM u la pynshai ba ka North Eastern Security Service Private Limited (NESSPL) ka la shu leh thok da kaba pyndonkam da kajuh ka Trading Licence ban thep ïa ka tender.
U Bah Banjop u la iathuh ba u CEM u la ong ba ha shwa ban buh da ka jingujor ejahar pyrshah ïa katei ka agency ka long kaba donkam ban da pynlong ïa ka jingtohkit kaba bniah pyrshah ïa katei ka agency.