Nongpoh, K’Lyngkot 14: Ka ICAR-Central Citrus Research Institute, Nagpur lyngba ka NEH Plan kala pynlong ïaka prokram ai jinghikai ba shisngi halor kumno ban kyntiew ïaka jingpynmih ïa u sohñiamtra khasi ne Khasi Mandarin haka shnong Sohkhwai ha Ri-Bhoi District, bad ïa katei ka jingïalang la pynlong hapoh ka jingpynïaid jong u Dr Dilip Ghosh Director, ka ICAR-CCRI Nagpur da ka jingkyrshan lang u Dr Evening Stone Marboh Senior Scientist, Regional Research Centre for Citrus (RRCC), Biswanath Chariali.
Ka thong jong kane ka prokram ai jinghikai ka long ban kyntiew ïaka rukom rep bad pynmih ïa u sohñiamtra Khasi bad ha kane ka prokram kumba 53 ngut ki nongrep kila wan ban shim bynta haka jingdonlang ki nongïalam shnong, namar ka shnong Sohkhwai kadei kawei naki shnong kaba pawnam halor ka jingpynmih ïa u sohñiamtra na Ri-Bhoi.
U Dr A Thirugnanval lem bad u Dr Darshan Kadam Senior Scientist, ICAR-Central Citrus Research Institute, Nagpur, Maharashtra, u la ban jur halor ka jingmyntoi ba ki paidbah ki ioh lyngba u sohñiamtra namar ka jaka ka long kaba biang eh bad lyngba katei ka prokram ki paidbah kila ioh ban ïakren markhmat bad kitei ki riewstad kumno ban kyntiew ïaka jingpynmih kham bun ïa u soh bad pyniar ïaka kam rep soh naka bynta ka jingmyntoi jong ki.
Shuh shuh ki nongrep ha katei ka sngi kila ioh ruh ka jinghikai kumno ban ïada ïa u soh naki jait jingpang bad ki khñiang bapher bapher kiba lah ban ktah ïaki tynrai soh ñiamtra bad ha katei ka sngi la ioh ruh ban sam ïaki dawai sboh bad kiwei kiwei sha ki nongrep ban kyntiew ïaka jingpynmih ïa u sohñiamtra ha katei ka thaiñ.
