Shillong, Kyllalyngkot 12: YU Superintendent of Police (SP) ka East Khasi Hills u la pynmih ïa ka jingbthah ba kyntu bad kyrpad ïa ki paidbah ba kynthup ïa ki trai kali, ki nongpynïaid kali kamai bad ki nongleit nongwan ba kin ïatreilang da kaba bud ryntih ïa ki jingbthah ban pynthikna ïa ka jingshngaiñ bad ka jingïaid beit ïaid ryntih ki kali.
ïa ka jingbthah la pynmih da u Superintendent of Police (SP) East Khasi Hills Bah Vivek Syiem. ka ba ong ba ym shah ban pynïeng kali kulmar ha ki jaka ki bym dei hynrei ban pynïeng ha ki jaka bala ai ka jingithuh lane ki jaka bala buh kyrpang.
Kino kino kiba pynkheiñ ïa ki jingbthah kin shah daiñ kuna naduh 500tyngka ha kaba nyngkong nangta haduh 1,500 tyngka lane 2,000 tyngka lada dang bteng ban pynkheiñ biang ha ryngkat ka shah tan kali katkum kyndon 177/179(1) MV Act).
Ki Local Taxi bad ki kali Tourist Taxi ki dei ban ïeng tang ha ki jaka ïeng kali ba la buh kyrpang lane ha ki jaka ba la ai bor ban pynïeng kali.
Kiba pynkhien iaka hukum kin shah dain kuna naduh 500 tyngka haduh 1,500 tyngka katkum ki kyndon Section 177/179(1) MV Act).
Ka jingpynbna ka mana ruh ban ñiah stet khamtam ha ki jaka ba bun briew, ki jaka ba kyllaiñ, ne ki surok kiba rit bad ha ki jaka ba khun.
La bthah ba ki nongñiah kali arshaka ba ki dei ban deng ïa ki helmet bad kiba pynkheiñ ïa ki kyndon kin shah daiñ kuna naduh 2,000 tyngka haduh 10,000 tyngka katkum ka Sections 179(1)/184/194 MV Act.
La bthah ba ki kali kit mar ki dei ban da tap bha ïaka kali bad kiba pynkheiñ kin shah daiñ kuna 2,000 tyngka katkum ka kyndon 179(1) MV Act.
Ka jingñiah kali haka por buaid ka dei ka kam beaiñ bad ïaki ba pynkheiñ ïaka jingbthah kin shah pynngat haki kyndon aiñ.
Kino kino kiba lap ba ki ñiah kali hapoh ka jingdih kyiad kaba palat pud kin shah pynshitom katkum ka kyndon 185 MV Act ryngkat ka kuna T.10,000 lane shah set phatok haduh 6 bnai lane baroh ar.
