Shillong, K’ Lyngkot 12: Ka Hynñiewtrep Youths’ Council ka pynrem jur ïa ka Sorkar Jylla lyngba ka Tnat Ka Koit Ka khia ka bym shym siew tulop ïa ki Nurse ba trei hapoh ka Kontrak naduh u bnai Risaw, 2025 bad pynrem ruh ïa ki khlem kano kano ka jingthoh watla hadien ka jingkut noh ka por ba kin trei naduh u bnai Risaw, 2025.
Kane ka jingleh ka long ka jingïuhroit bad lehbeiñ da ka Sorkar. Ban pyntrei khlem da Siew tulop bad khlem ki jingthoh jingtar ne hukum ka long ka jingpynkheiñ ïa ki aiñ kiba ïadei bad ki Nongtrei bad kumjuh ruh ka jingpynkheiñ ïa ka him longbriew man briew. Ban shu kular da ka ktien bad hukum khlem jingthoh kam long kaba dei bad ïahap ruh ban pyntrei khlem jingsiew da ki bnai.
Ka Seng ka pynkynmaw ïa ki kular jong kane ka Sorkar kaba kam ba ka buh ïa ka koit ka khiah kum ka ba hakhmat eh hynrei kumno pat ka mud ban pyntrei ïa ki Nongtrei kum ki Nurse khlem ka jingsiew tulop kaba lah buh jingeh ïa ki ïing ki sem ki jong kin trei naduh bad ktah ruh ïa ka bor pyrkhat bad ka ïoh kam kot ka jong ki. Kane ka jingleh ka pynpaw pyrthei ïa ka jingbymler bad jingleh bym suidñiew jong ka tnat ba dei peit ha ryngkat ka Sorkar hi baroh kawei.
“Ngi dawa ba dei ban siew noh mardor ïa ka tulop bad kiwei ki jingsiew naduh u bnai Risaw, 2025; dei ban ai noh ïa ka jingthoh ban bteng biang ïa ka kam ba kin trei bad ban pynshitom ïa ki ophisar kiba donkti ha kane ka jinglehbeiñ bad ïuhroit ïa ki nurse ba trei kontrak,” ong ka HYC.
Ki Nongtrei hapoh ka tnat ka koit ka khiah kim dei ki mraw. ïa ka hok jong ki ngin nym shah ban ïuhroit, ong kas kyrwoh na u Bah Roy Kupar Synrem, President,
Hynñiewtrep Youths’ Council.
