Nongstoiñ, K’lyngkot 11: Ka Nongstoiñ Block Congress Committee (NBCC) ha ka jingïasnohktilang bad ka Meghalaya Pradesh Congress Committee (MPCC), ban ïeng pyrshah halor ka jingpynkylla kyrteng jong ka BJP ïa ka skhim MGNREGA 2005 sha ka VB G RAM G 2025, ka la mih shakhmat ban pynpaw pyrthei ha ka sngi saitjaiñ jong ka taïew ha Congress Bhavan ha Nongstoiñ, ha ka jingïadonlang ruh u bah Bah Kynpham V.Kharlyngdoh Chairman Legal Cell MPCC bad District President SWKHD Congress Committee, u Bah Eric C Kharsyntiew President Nongstoiñ Block Congress Committee, Bah C.K Bani Presdent Mawsynrut BCC, ki riew rangbah bad kiwei kiwei.
Na ka liang jong u bah Kynpham V.Kharlyngdoh haba ïakren sha ki lad pathai khubor hadien ba la wai katei ka jingïalang, u la ong ba kumba 20 snem ka skhim MGNREGA ka la ïaid hynrei ka BJP mynta ka pynkylla noh ïa ka kyrteng jong katei ka skhim ïa kaba ym tip kaei ka jingthmu jong ka BJP sha lyndet.
U la ong ruh ba na ka liang jong ka seng Congress ka sngewkhia ïa kane ka jingpynkylla kyrteng kaba long kum ka jingthmu ban pynïap ïa ka kyrteng jong u Mahatma Gandhi. Kane ka Act kaba mynta kam dei shuh ka demand driven hynrei ka la dei ka supply driven, kaba mut kam dei shuh ba ki shnong ki thaw kin phah proposal sha ka sorkar. Hynrei, mynta ka sorkar ka ban notify kan ai ïa ka skhim ha kata ka Jylla ka District ne ka shnong bad kam dei shuh ka Guarantee watla ki pyrshang ban pynkiew na ka 100 sha ka 125 sngi.
U la ong ruh ba kane ka Act kaba thymmai kan sa pynduh mynsiem ruh ka kiba bun ki Jylla kiba duk kum ka Meghalaya, namar kumba ka paw mynta ka budget ka long 90 na ka Central bad 10 na ka State kaba lah ban ban khia ka ki Jylla lada ka funds allocation ka tam bad ka neh ruh ban pyntreikam ka kane ka skhim, namar ka jingpynkylla ha kiba bun kum ki biometrics mobile attendance app bad kumta ter ter.
U la pynpaw ka jingsngew phylla ruh ba ym don wat tang kawei ka party hapoh ka Jylla ki ban kren ei ei halor kane. Hynrei, na ka liang ka Party Congress kan ïakhun ïa kane bad kan sa leit sha ki paidbah ha ki Shnong ki thaw ban pynsngewthuh halor ka jingïapher jong ka MGNREGA pyrshah ïa ka VB G RAM G, ong u bah Kynpham.
