Yn sdang ki doktor ka Civil Hospital Mawkyrwat da ka ‘Laparoscopic Surgery’ ban sumar ïa ki ar jait jingpang

Mawkyrwat, K’lyngkot 11 : Ha ka jingïaid lynti jong ka Civil Hospital Mawkyrwat kaba la kynjoh mynta ïa ka karta ba 14 snem naduh ba la buh ïa u Mawnongrim bad 4 snem pat naduh ka jingplie paidbah ïa ka jingtei ne ka Building ba thymmai bad ha kaba ki jingtreikam hapoh kane ka jaka sumar ka la long na ka jingbym biang sha ka jingnangïaid shaphrang lyngba ka jingtrei shitom jong ki doktor, ki nurse lem bad ki nongtrei hapoh jong ka.
Lah ban kdew ba ka jingjop bad jingnang kiew ha ki jingtreikam ha kane ka Civil Hospital Mawkyrwat ba na ka jingshah kynthoh ba kane ka jaka sumar ka dang duna ha kiba bun ki liang hynrei da ka jingtrei shitom bad jingïatreilang jong baroh kiba trei hapoh kane ka jaka sumar, ki doktor mynta ki la sdang ban pyndonkam ban sumar briew lyngba ka juk ba mynta khamtam eh ban sumar ïa ar tylli ki jait jingpang kiba don ha ka met ki briew kata ban weng ïa u appendix bad u maw ksang ha kaba ki la thmu ban leh da ka ‘Laparoscopic Surgery’.
U Dr. D. Suting uba dei u General Surgery ka Civil Hospital Mawkyrwat, u la ong ba kane ka jingpyntreikam ïa ka ‘Laparoscopic Surgery’ la sdang naduh ka taïew jong ka 7 tarik Kyllalyngkot, 2026 ha kaba ki la ïoh ban sumar ïa iwei u longkmie. U la ong, “Watla ha kine ki snem bad ki bnai ba la dep, ka lynti ba ki pyntyllun ïa ki kam ka long da ka lynti kaba eh, hynrei da ka jinglong jingïaishah, jingïaitrei hok ïa ki kam bad da ka jingwad ïa ki lad jingïarap, ka Civil Hospital Mawkyrwat mynta ka kynti ka la lah ban sdang noh ïa kane ka rukom sumar ba thymmai, kata ban sei ïa ki jingpang na ka met briew ka long ym shuh ban shu ot ïa ka doh hynrei da kaba shu sam thliew ne da kata ka Laparoscopic Surgery”.
“Ïa mynta, kum ka jingsdang ngin leh shwa tang ar jait ki jait jingpang kiba don ha ka met ki briew kata ban weng ïa u appendix bad u maw ksang”, ong u Dr. D. Suting.
Haba bynrap ïa ka jingkren u la ong ba da kane ka rukom sumar ka lah ban ai jingïarap shibun ïa ki nongpang, namar ka dak jong ka jingmong ha ka met kan long kaba rit bad kam shim por shuh ban ïoh jingkoit, ym kumba leh da kaba shu ot ïa ka doh. Namarkata, ula buh ka jingkyrpad ïa baroh ki briew kiba donkam ki jingïarap ne kiba don ïa kum kine ki jingpang ha ka met ba kin mih shakhmat ban wan phah sumar, khlem da tieng, namar ki tiar ki la dep ban pynbiang baroh ha kane ka jaka sumar bad ki la don lut bad ka jingsumar ruh ka long kaba shngaiñ.
Haba kren bad ki lad pathai khubor, ka Kong Aitibanylla Syiemlieh na ka shnong Rangthong, kaba la shah sumar hapoh ka Civil Hospital Mawkyrwat, ka la pynpaw ka jingnguh ïa U Blei Trai Kynrad uba la ai ïa ka jingkhiah ïa ka lyngba ka jingsumar jong ki doktor. Ka la pynpaw ruh ka jingkyrkhu bad jingïaroh ïa ki doktor, ki nurse bad baroh ki nongtrei hapoh kane ka jaka sumar kiba la pynbit pynbiang ïa ki jingdonkam baroh ha ka por jingsumar tat haduh ba kan da ïoh ban mih na kane ka jaka sumar ban leit phai ha la ka jong ka ïing ka sem.