Shna noh da ki jaka ïeng kali ha National Highway, kyrpad ka MCTODA ïa ka sorkar jylla

Shillong, K’Lyngkot 10 : Ka Meghalaya Commercial Truck Owners and Drivers Association (MCTODA) ka la kyrpad ïa ka sorkar jylla ban shna noh da ki jaka ïeng kali kiba kyrpang (layby) ha ka National Highway ban weng ïa ka jingeh ba ki trok kit mar ki ju kynduh.
Haba kren hadien ka jingïalang bah ba nyngkong jong ka seng ha une u snem, u President ka MCTODA u Bah Moslandar Marngar u la pynpaw, “Ki trok kim lah ban ïaid ha ka por mynsngi, khamtam ha Ri Bhoi, namar ba la pynjari da ka kyndon khang rung trok. Kumta ki trok kiba pyrshang ban poi sha Assam ki hap beit ban ïeng harud surok ha Byrnihat, Ri Bhoi, namar baroh arliang ka Assam bad Meghalaya kim ailad ban pynïeng kali ha ka por ba don ka jing rung trok.”
Ka seng ka la rai ban ïakynduh ïa ki heh sorkar bad ïa u MP ka Shillong ban pynbeit ïa katei ka jingeh bad ban pynbor ban shna ïa ki layby na ka bynta ki jaka pynïeng kali kiba biang.
U Bah Moslandar Marngar u la bynrap, “Ngi la sngewthuh ba ka jingeh ka la mih namar ka jingbym don ki layby ha Meghalaya, bad ka sorkar ka dei ban pyrkhat ban shna ïa kum kine ki jaka”.
Ka MCTODA ka la pynpaw ruh ïa ka jingsngewkhia halor kane ka jingpynbeit kaba mynta ban thep marbam da ka Food Corporation of India (FCI), da kaba kynnoh ba ki donkti ki nongshim kabu ban kamai (middlemen), kaba wanrah ïa ka jingduhnong ïa ki trai trok bad ki nongniah trok.
Ka seng ka thmu ban ïakynduh ïa ki heh jong ka FCI bad ban pan jingïarap na ka sorkar.
“Halor kane, ngi la rai ban ïakynduh ïa ki heh jong ka FCI bad ngin pan jingïarap na ka sorkar namar ngi la thoh sha ka FCI hynrei haduh mynta ym pat shym la leh eiei halor kane,” u la ong.