Nongstoiñ, K’lyngkot 10: Na ka liang ki riew rangbah thaiñ Ri-Muliang ki la pynpaw ka jingdiaw mynsiem namar ka jingud jingnam na ki paidbah ka dong ka thaiñ, halor ka jingthurmur ka rukom kheiñ rukom diah ïa ka bai lait ha ka thaiñ Rimuliang hi baroh kawei, ha kaba ki la pynpaw ba ka tnad ba dei peit ban shimkhia halor kane.
Ki riew rangbah ki la pynpaw ba ka long kaba tikna ban ong ba ka jingkheiñ bill hapoh ka thaiñ Rimuliang, kam don da ka rukom kheiñ kaba katkum ka jinglah pyndonkam (meter reading) ki nongshong shnong longïing. Hynrei la shu kheiñ kyllum, ha kaba don ki khep ba kiba duk ba suk kiba ju pyndonkam tang khyndiat eh ka bor light, hynrei ki shah oh dor ha ka Office kham heh bun shah ban ïa kito kiba kham bit kham biang kiba pyndonkam bording.
Kum kane ka rukom kheiñ bill ka pyni ïa ka jingleh shilliang bad ka wanrah jingeh ïa kiba duk ba suk kiba pyndonkam hok ïa ka bording tang ban ïoh jingshai ha ka por mynmiet. Kumta halor kane ka mad, ki kyrpad jur ïa ka ophis ban pynbeit mardor ïa kaba kum kane ka jingleh ka bym long ryntih ïa ki nongshong shnong.
Ki la dawa ruh na ka tnad ban ker fencing noh ïa ki Transformer bym pat don jingker, namar ba ki don shibun ki transformer ki bym pat fencing kiba lah ban long ka jingma ïa ki paidbah nongshong shnong, khamtam ki khynnah ki khunlung ha ki shnong ki thaw kumjuh ki jingri jingdup. Kumta ki la kyntu jur ban ker noh ïa kine ki Transformer ha thaiñ Tynghor bad Ktiehthawiar.
Shuh shuh, dei ban pyndep noh ban pynpoi bording ïa ki Shnong kiba dang sah na kiba la sdang trei ha ki snem ba la dep. Ka jingpyntrei na ka Office jong ba dei peit ban pynpoi bording ha ka shnong Langpih, Mawdiangsnam, Umpha, Umyiap, Umbyrsit bad kiwei ki shnong, kiba haduh mynta ki post Electric ki la shu ieng thylli ha kitei ki shnong.
Kumta dei ban pyndep noh lada dang dei ban pyntrei ïa ki bad lada ym don shuh ka scheme ha kitei ki Shnong dei ban sanction thymmai noh, khnang ba kitei ki shnong kin ïoh lang ïa ka juh ka jingmyntoi ha kiba bun ki kam.
